Россиялик вазир МДҲ ҳудудида кириллча ёзувни қайтаришга даъват этди, ўзбек твиттерчилари реакция билдиришди

Россия Федерацияси таълим ва фан вазири Ольга Васильева МДҲ давлатлари доирасида ягона имлодан фойдаланишга қайтишни таклиф этди.

Совет иттифоқи тарқалгач, Ўзбекистон, Туркманистон ва Озарбойжонда кирилл алифбосидан лотинчага имлога ўтилган. Туркманистон ва Озарбойжонда лотинчага тўлиқ ўтилиб, кирилл имлосидан мутлақо фойдаланилмаётган бўлса, Ўзбекистонда ҳар икки имлодан параллел равишда фойдаланиб келинмоқда. Қозоғистон ҳукумати ҳам 2025 йилдан мамлакат тўлиқ лотинчага ўтишини таъкидлаган.

«Сўнгги 10 йилда жуда катта мавзу очилди: ёзувларнинг лотинчалаштириш ва арабчалаштириш. Айнан ҳозир биз МДҲ доирасида ягона ёзувга ўтишимиз керак — бу ёзув эса кириллча, чунки сўровларнинг кўрсатишича, бизнинг ва яқин қўшниларимиз аҳолиси, кириллча шрифтга боғланиб қолганлиги ва унинг зарурлиги ҳақида гапиришмоқда», — деди Васильева мавзуси «Рус дунёси ва рус тили: тарихий илдизлар ва ривожланиш йўналишлари» бўлган III Ливадия форумида.

Васильеванинг қайд этишича, кирилл имлосининг тарқатилишида Россия ўзининг қатъий позициясини намоён этмоғи керак.

«Гарчи сўнгги йигирма йил ичида у (позиция) бироз юмшатилиб юборилди», — деган Васильева.

Васильеванинг бу фикрлари эълон қилингач, твиттер ижтимоий тармоғининг Ўзбекистондаги фойдаланувчилари унга қарши ҳэштег билан ўз нарозиликларини изҳор этишни бошлашди.