Lincoln энг катта ва энг қиммат моделини тақдим этди

Lincoln компанияси Navigator тўртинчи авлод йўлтанламас автомобилининг узайтирилган намунасини тақдим этди. Янги автомобиль бу русумдаги автомобиллар рўйхати ичида энг йириги ва энг қиммати бўлиб турибди.

Extended модификацияси оддий Navigator’дан 30 сантиметрга узун ва автомобилнинг умумий габарит узунлиги 5,64 метрга етади. Ғилдираклар базаси ҳам 25 сантиметрга оширилган.

Янги автомобиль кенгроқ орқа эшиклари билан фарқланади. Lincoln тарқатган хабарларга кўра, бу сегментдаги автомобиллар ичида иккинчи қатор ўриндиқлардан кейин энг катта захира майдонига эга. Ўриндиқларнинг учинчи қаторидан кейинги юк майдони узайтирилган намунада деярли 425 литр ҳажмига тенг.

Оддий «Навигатор» ва унинг Extended модификацияси АҚШда шу йилнинг кузидан сотувга чиқарилади. Оддийсининг нархи 72 минг доллар бўлса, узайтирилган намунасиники 81 минг доллардан бошланади.

Black Label деб аталувчи топ комплектацияда узайтирилган йўлтанламас автомобиль камида 96.905 долларга нархланади. Қўшимча жиҳозлар рўйхатида, масалан, орқа ўриндиқдаги йўловчилар учун мультимедия комплекси (қўшимча 2 минг доллар), 30 йўналишда ўзгартириш мумкин бўлган ва массаж қилувчи қурилмага (1250 доллар) эга олд ўриндиқлар ҳам бор.