Дин ишлари бўйича қўмита фаолияти такомиллаштирилди — Президент қарори

16 апрель куни Ўзбекистон Республикаси Вазирлар Маҳкамаси ҳузуридаги Дин ишлари буйича қўмита фаолиятини такомиллаштириш чора-тадбирлари тўғрисидаги Президент қарори (ПҚ–3668) қабул қилинди.

Қарор Ўзбекистон Республикаси Президентининг 2018 йил 16 апрелдаги ПФ–5416-сон «Диний-маърифий соҳа фаолиятини тубдан такомиллаштириш чора-тадбирлари тўғрисида»ги Фармонига мувофиқ ҳамда Ўзбекистон Республикаси Вазирлар Маҳкамаси ҳузуридаги Дин ишлари буйича қўмита фаолиятини янада такомиллаштириш мақсадида қабул қилинди.

Қарор билан Вазирлар Маҳкамаси ҳузуридаги Дин ишлари бўйича қўмитаси бошқарув ходимларининг чекланган умумий сони 51 кишидан иборат янгиланган тузилмаси тасдиқланди.

Қўмита раисига, зарур ҳолларда, Қўмита тузилмасига ходимларнинг белгиланган чекланган умумий сони доирасида ўзгартиришлар киритиш ҳуқуқи берилди.

Қўмитанинг Диний-ижтимоий жараёнларни ўрганиш ахборот-таҳлил маркази Қўмита томонидан тасдиқланадиган низом асосида фаолият олиб боради ва унга Қўмита раисининг ўринбосари – Марказ раҳбари бошчилик қилиши, Марказ ходимларининг меҳнатига ҳақ тўлашнинг ягона тариф сеткаси бўйича разрядлари Қўмита марказий аппаратининг тегишли ходимлари учун белгиланган разрядларга тенглаштирилиши белгилаб қўйилди.

Давлат ҳокимияти ва бошқаруви органлари ҳамда маҳаллий давлат ҳокимияти органлари Марказ сўровига кўра унга юклатилган вазифалар билан боғлиқ бўлган зарур ҳужжатлар, статистик ва бошқа маълумотлар, таҳлилий материаллар, хулосалар ва бошқа ахборотлар бепул тақдим этилишини таъминлайди.

Шунингдек, Қўмита ҳузуридаги Конфессиялар ишлари буйича кенгашнинг янгиланган таркиби тасдиқланди.

Кенгаш Қўмита ҳузурида фаолият юритадиган жамоатчилик-маслаҳат органи ҳисобланади.

Қўмита раиси лавозимига кўра Кенгаш раиси ҳисобланади. Кенгаш аъзолари ўз фаолиятини жамоатчилик асосида олиб боради.

Кенгаш ўз мажлисларида республика ҳудудлари ва хорижий давлатлардаги диний-ижтимоий жараёнларнинг жорий ҳолатини, шу жумладан Марказ томонидан тайёрланган ахборот-таҳлилий материалларнинг тегишли қисмини доимий равишда муҳокама қилиб боради ва натижасига кўра Қўмитага тавсиялар беради. Кенгаш Қўмита томонидан тасдиқланадиган низом асосида фаолият олиб боради.

Қўмита Тошкент шаҳри, Ислом Каримов кўчаси, 43-уй манзилидаги бинога жойлаштирилди. Ўзбекистон Республикаси Молия вазирлигига:

ушбу қарордан келиб чиқиб, 2018 йил учун тасдиқланган Ўзбекистон Республикаси Давлат бюджета параметрлари доирасида зарур бўлган бюджет маблағларини ажратиш, 2019 йилдан бошлаб эса ҳар йили ушбу маблағларни назарда тутиш;

Қўмитанинг асосли ҳисоб-китоблари асосида янги ташкил этилган таркибий тузилмалар ва Марказ учун зарур бўладиган компьютер техникаси, мебель ва жиҳозлар, алоқа тармоғи билан таъминлаш ҳамда Марказ жойлаштириладиган маъмурий бинони таъмирлаш учун маблағлар ажратилишини таъминлаш юкланди.

Вазирлар Маҳкамаси ҳузуридаги Дин ишлари бўйича қўмита марказий аппаратининг тузилмаси

Президентнинг ушбу қарорига кўра Вазирлар Маҳкамасининг қуйидаги қарорлари ўз кучини йўқотган:
1. Вазирлар Маҳкамасининг 2004 йил 23 апрелдаги 196-сон «Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита фаолиятини янада такомиллаштириш тўғрисида»ги қарорининг (Ўзбекистон Республикаси ҚТ, 2004 й, 4-сон, 41-модда) 1 ва 3-бандлари, қарорга 1-илова.
2. Вазирлар Маҳкамасининг 2014 йил 20 январдаги 10-сон «Диний мазмундаги материалларни тайёрлаш, олиб кириш ва тарқатиш соҳасидаги фаолиятини амалга ошириш тартибини такомиллаштириш чора-тадбирлари тўғрисида»ги қарорининг (Ўзбекистон Республикаси ҚТ, 2014 й, 1-сон, 5-модда) 1-банди тўртинчи хатбошиси ва қарорга 3-илова.