Улкан тозалаш тизими Тинч океанини чиқиндилардан тозалашга киришди

Голландиялик Боян Слатга қарашли Ocean Cleanup фонди Тинч океанини чиқиндилардан тозаловчи улкан тизимни ишга туширди.

Компьютер ўйини қаҳрамони "Пакман" номини олган тизим океандаги пластик чиқиндиларни йиғиб олади ва қуруқликка чиқаради. Унинг асосий вазифаси Калифорния ва Гавайи ўртасидаги улкан чиқинди уюмини йўқотишдир. Тизим муваффақиятли ишлайдиган бўлса, чиқинди уюми беш йил ичида икки бараварга камаяди.

Узунлиги бир километрга яқин ва қиймати 20 миллион доллар бўлган мазкур тизим биринчи йилда океанни 70 минг тонна чиқиндидан халос қилади. Тинч океанида 1,6 миллион квадрат километр майдонни эгаллаган чиқинди уюми ҳаттоки коинотдан ҳам кўриниб туради.

Тизимни голландиялик ихтирочи ва бизнесмен Боян Слат яратган. У 16 ёшида Тинч океанини тозалаш муаммоси билан қизиқа бошлаган. Ҳозирда 24 ёшда бўлган Слат ўтган давр мобайнида Ocean Cleanup фондини ташкил этишга, краудфандинг услуби бўйича 20 миллион доллардан ортиқ пул йиғишга ва улкан тозалаш тизимини яратиб, ишга туширишга эришди.