Хакерлар шимолий кореялик қочоқлар ҳақидаги маълумотларни ўғирлашди

Хакерлар КХДРлик мингга яқин қочоқ ҳақидаги маълумотларни қўлга киритишди. Бу ҳақда Жанубий Кореянинг «Ёнхап» агентлиги хабар берди.

Шимолий кореялик 997 нафар қочоқ ҳақидаги батафсил маълумотлар ёзилган файл Сеулдаги миграция маркази компьютерида бўлган. Маълум бўлишича, компьютер вирус билан зарарланган ва ундаги маълумотлар вирус муаллифлари қўлига тушган. 

Бу хабарни Корея бирлашув вазирлиги вакиллари ҳам тасдиқлашди.  

Маълумотлари хакерлар қўлига тушган барча шахсларга бу ҳақда маълум қилинган. Полиция ҳозирча хакерлик ҳужуми ортида ким турганини аниқлай олмади.

Аввалроқ 2018 йил январидан ноябрига қадар Шимолий Кореядан Жанубий Кореяга 1042 киши қочиб ўтгани айтилганди.