Замонавий технологияларга қизиқувчи ёшлар учун «Digital Generation Camp» ёзги оромгоҳи ташкил этилди

Ўзбекистон ёшлар иттифоқи ҳамда Тошкент шаҳридаги Инҳа Университети ҳамкорлигида «Digital Generation Camp» лойиҳаси ишга туширилди. IT соҳасидаги мазкур лойиҳа асосида 18-22 июнь кунлари «Ёшлар оромгоҳи»да «Digital Generation Camp» ёзги оромгоҳи ташкил этилади. Унда иштирок этиш учун ўқув тизими орқали лойиҳанинг 5та йўналиши бўйича 16 ёшдан 25 ёшгача бўлган 90 нафар ёшлар саралаб олинди.

«Digital Generation Camp»га йиғилган иштирокчиларга юртимизнинг энг етук мутахассислари ва халқаро экспертлар машғулотлар ўтади. Дарслар орқали қатнашчиларнинг қобилиятлари аниқланади. Иштирокчилар ўқув платформа олдидан зарур ишчи буюмлар билан таъминланиб, 5 кун мобайнида амалий ва назарий машғулотларда ўз тажрибаларини бойитади. IT соҳасида мутахассислар билан фикр алмашиш жараёнида янги яратилаётган лойиҳалар устида иш бошлашади.

Оромгоҳнинг сўнгги куни иштирокчилар якка ва жамоавий тарзда ўз лойиҳалари тақдимотини намойиш этади. Ҳар бир қатнашчи фаол иштироки учун халқаро сертификат билан тақдирланади. Лойиҳа аъзолари бирга ишловчи жамоани яратиш орқали келгусида яратиладиган лойиҳаларни ҳам жамоавий амалга оширишни ўз олдига мақсад қилган.

Лойиҳа эркин фикрловчи, технологик трендларга қизиқувчи ёшларни дастурлаш, робототехника, медиа ва дижитал маркетинг, дизайн, киберспорт йўналишлари бўйича бирлаштиради. Бундан ташқари, улар жамоавий бўлиб ишлашларини таъминлаб, ҳамкорлик ҳамда режалаштириш қобилиятини кучайтиришга хизмат қилади», дейилади Ёшлар иттифоқи матбуот хизмати хабарида.