Наманганда «Кобальт» каналга тушиб кетди, ҳайдовчи воқеа жойида вафот этди

Жорий йилнинг 10 сентябрь куни Наманган вилоятининг Чортоқ туманида ЙТҲ натижасида фуқаронинг ҳалок бўлиши билан боғлиқ вазият содир бўлди. Бу ҳақда Фавқулодда вазиятлар вазирлиги хабар қилмоқда.

Қайд этилишича, кескин бурилишда «Кобальт» автомашинасининг ҳайдовчиси бошқарувни йўқотиб, автомобиль бир неча марта ағдарилган ва яқин атрофдаги «Наманган» каналига тушиб кетган. 

Автомобиль ағдарилган вақтдаги куч ҳайдовчини машинадан улоқтириб юборган ва у воқеа жойида вафот этган. Шунингдек, машина салонида яна бир нафар аёл киши бўлган. У сув остида қолган машинадан хавфсиз чиқиб кетишга муваффақ бўлган. 

Билдирилишича, бир неча дақиқадан сўнг воқеа жойига Наманган вилояти Фавқулодда вазиятлар бошқармаси қутқарувчилари етиб келиб, тегишли амалий чоралар кўрилди. Жабрланувчи касалхонага етказилди. Машина махсус техникалар ёрдамида каналдан олиб чиқилган.