Греция ҳукумати россиялик миллиардерга хусусий оролда курорт қуришга рухсат берди

Греция ҳукумати 2020 йил декабри охирларида россиялик миллиардер Дмитрий Риболовлевнинг қизи Екатеринага тегишли Скорпиос оролида курорт қуришга рухсат берди. Бу ҳақда Greek Reporter нашрига таяниб Forbes хабар берди.

Бу борадаги инвестицион режани атроф-муҳит ва энергетика, кемасозлик ва орол сиёсати, туризм вазирлари ҳамда ривожланиш ва инвестициялар вазири ўринбосари имзолади, деб ёзмоқда Keep Talking Greece нашри.

Режага кўра, майдони 9420 кв. метрли меҳмонхона, бассейнлар, сунъий кўл, йўллар, вертолёт майдони, паррандачилик фабрикаси, фермалар, отхона, узумзор ва мевазорлар барпо этилади.

 Бундан ташқари, оролнинг шарқий ва жанубий тарафларида жойлашган, унинг собиқ эгаси Аристотел Онассис яшаган уйлар таъмирланади. Скорпиос порти кенгайтирилади ва модернизация қилинади.

Лойиҳа қиймати 165 млн евро деб баҳоланмоқда, у 2024 йил ёзида якунига етказилади.

Дмитрий Риболовлев оролни 2013 йилда Аристотел Онассиснинг меросхўри Афина Онассисдан 120 млн долларга сотиб олганди. Орол харидори сифатида эса унинг қизи номидан иш юритувчи компания кўрсатилган.