Инновация вазирлиги: Тошкентдаги чанг таркибида инсон учун хавфли моддалар йўқ

Инновацион ривожланиш вазирлиги ҳузуридаги Илғор технологиялар маркази ва Фанлар академиясининг Биоорганик кимё институти олимлари Тошкентдаги чанг бўрондан кейин чўккан чанг таркибини ўрганиб чиқди.

Вазирлик ахборот хизматининг Kun.uz'га маълум қилишича, чанг таҳлили учун намуналар Олмазор тумани “Беруний” метро бекати ва Мирзо Улуғбек туманининг Академиклар шаҳарчаси ҳудудларидан олинган.

Чанг таркиби SmartSEM дастурий таъминот ёрдамида 100 микрометрдан 1 микрометргача бўлган турли масштабларда олинди. Намуналар SEM – EVO MA 10 (Zeiss, Германия), Panalytical Empyrean рентген дифрактометри, Agilent 7890B газ хроматографи каби қурилмаларда таҳлил қилинди. Ускуналар иши Data Collector дастури ёрдамида назорат қилинган.

Натижалар шуни кўрсатадики, чанг ҳажми 5 микронгача бўлиб, бу катталикдаги чанг зарралари анча зарарсиздир.

2021 йил 5 ноябрдаги чанг намуналари 42 турдаги пестицидларга газ хроматографияси ёрдамида таҳлил қилинганда намуналарда пестицидлар мавжуд эмаслиги аниқланди. Таҳлил маълумотлари чанг таркибида туз ҳам меъёрда эканини кўрсатди.

Чанг намуналарида рН ўлчови чанг эриганида ишқорий хусусиятларини кўрсатди. Намуналар таҳлили улар табиатига кўра стандарт чанг эканлигини кўрсатди. Чанг таркибида оғир металлар, тузлар, инсон саломатлиги учун хавфли пестицидлар мавжуд эмас”, – дейилади расмий маълумотда.

Эслатиб ўтамиз, 4 ноябрь кечасида Тошкент ҳавосида чанг миқдори белгиланган миқдордагидан 30 баробаргача ортгани хабар қилинганди. Ноқулай об-ҳаво таъсирида биргина 4 ноябр кунининг ўзида пойтахтда 678 киши нафас қисиши туфайли “Тез ёрдам” чақирган.

Бугун, 9 ноябр куни “Ўзгидромет” 1-6 ноябр кунлари Тошкент шаҳридаги атмосфера ҳавосининг сифати тўғрисида ахборот берди.

13та стационар постда олиб борилган кузатувларда аниқланишича, шаҳар бўйича ушбу даврда суткалик рухсат этилган меъёрларнинг азот диоксиди 1,3 марта; чанг бўйича 11,4 марта бўйича ва фенол бўйича 2,0 марта ортгани қайд этилган. Бошқа ифлослантирувчи моддалар санитар меъёрдан ошмаган.