Қозоғистондаги тартибсизликлар вақтида икки нафар Қирғизистон фуқароси ҳалок бўлгани маълум қилинди

Хабар қилинишича, Қозоғистон ҳуқуқ-тартибот органлари томонидан беш нафар Қирғизистон фуқароси қўлга олинган.

Фото: EPA/Vostock-photo

Қирғизистоннинг икки нафар фуқароси Қозоғистонда юз берган тартибсизликлар вақтида ҳалок бўлган. Бу ҳақда Қирғизистон давлат миллий хавфсизлик қўмитаси маълум қилди, деб хабар берди ТАСС.

"10 январ ҳолатига кўра, ҳуқуқ-тартибот кучлари ўтказган тадбирлар натижасида беш нафар Қирғизистон фуқароси қўлга олинган, оммавий тартибсизликлар вақтида икки нафар қирғиз фуқароси ҳалок бўлган", - дейилади хабарда.

Маълумот берилишича, мамлакат хавфсизлик қўмитаси, ТИВ ва ИИВ "оғир ҳуқуқий ҳолатга тушиб қолган Қирғизистон фуқаролари сонини аниқлаш бўйича қозоғистонлик ҳамкасблари билан икки томонлама алоқада бўлиб турибди".

Хабарга кўра, "қўлга олинган фуқаролар керакли текширув тадбирларидан сўнг қўйиб юборилмоқда".

"Шу муносабат билан Қозоғистондаги ватандошларимизни хотиржамлик ва тушунишга чақирамиз", - дейилади хабарда.

Аввалроқ Қирғизистон ҳукумати Қозоғистонда бўлиб турган ва ўз ватанига қайтиш истагида бўлган мамлакат фуқароларини эвакуация қилишни бошлаганди.

#Қирғизистон #Қозоғистон

2 январь куни Қозоғистоннинг Манғистау областида суюлтирилган газ нархи икки бараварга кўтарилганидан норози бўлган қозоғистонликлар оммавий митингга чиқишди ва кейинги кунларда намойишлар бутун мамлакат бўйлаб ёйилди.