Ўзбекистон ўртоқлик учрашувида Жанубий Суданни йирик ҳисобда енгди

Учрашувдан олдин словениялик мураббий фақат икки футболчи хизматидан фойдалана олмасди – бир ўйинлик дисквалификация сабабли Фаррух Сайфиев ва коронавирус юқтириб олган Иброҳимхалил Йўлдошев. 

Учрашувни ҳужумкор бошлаган вакилларимиз 6-дақиқадаёқ ҳисобни очишди. Чап қанот ҳимоячиси Шерзод Насруллаевнинг зарбасини дарвозабон бартараф этгач, қайтган тўпни Элдор Шомуродов дарвозага тескари турган ҳолда товони билан ҳисобни очди – 1:0.

29-дақиқада эса Жавоҳир Сиддиқовнинг узатмасидан кейин Элдор дарвозабон билан яккама-якка вазиятга чиқиб, дублини расмийлаштирди – 2:0.

Иккинчи бўлимнинг 67-дақиқасида эса африкалик футболчилар ўз жарима майдонларида қўл билан ўйнашди. Белгиланган пенальтини эса Жалолиддин Машарипов «Паненка услуби»да ижро этиб, фарқни йириклаштирди – 3:0.

Шу тариқа, Ўзбекистон миллий жамоаси Дубайда ФИФА кунлари доирасидаги илк расмий ўртоқлик баҳсида йирик ҳисобда ғалаба қозонди. Навбатдаги баҳс 1 февраль куни Янги Зеландияга қарши ўтказилади.

Ўртоқлик учрашуви. БАА, Дубай.
27 январь (пайшанба)
Ўзбекистон – Жанубий Судан – 3:0
Голлар: Элдор Шомуродов 6, 29, Жалолиддин Машарипов 67 пенальтидан.
Ўзбекистон: 16.Валижон Раҳимов, 9.Дилшод Саитов (2. Ҳожиакбар Алижонов, 80), 15.Умарбек Эшмуродов, 2.Ислом Қобилов, 18.Шерзод Насруллаев, 20.Акмал Мозговой (17.Сардор Собирхўжаев, 57), 7.Отабек Шукуров, 22.Жавоҳир Сидиқов (6.Азиз Ғаниев, 46), 23.Ҳожимат Эркинов (21.Шаҳбоз Умаров, 57), 10.Жалолиддин Машарипов (8.Ойбек Бозоров, 72), 14.Элдор Шомуродов (11.Шерзод Темиров, 73).