Тошкент шаҳар ҳокимлиги Мурари Лал Жаланнинг сўзларига муносабат билдирди

Тошкент шаҳар ҳокимлиги “Minerva City” инвестори Мурари Лал Жаланнинг Kun.uz'га берган интервюсида шаҳар ҳокимига нисбатан айтган гапларини ҳуқуқий баҳо берилмагунга қадар “давлат хизматчисини обрўсизлантиришга қаратилган” деб ҳисоблашини маълум қилди.

“Мурари Лал Жаланнинг гаплари асосли ёки асоссизлигини текшириш учун ва айбдорларга нисбатан қонуний чора кўришларини сўраб Ўзбекистон Республикаси Бош прокуратурасига мурожаат қилинади.

Барча оммавий ахборот воситаларини Ўзбекистон Республикаси Бош прокуратураси томонидан ушбу ҳолат қонуний асосда ўрганиб чиқилгунга қадар, асоссиз маълумотларни тарқатмасликка чақирамиз”, – дейилади ҳокимлик эълон қилган баёнотда.

Мурари Лал Жалан интервюда йирик инвестицион лойиҳани амалга ошириш унинг компанияси, Инвестициялар ва ташқи савдо вазирлиги ҳамда Тошкент шаҳар ҳокимлиги ўртасида тузилган уч томонлама шартнома асосида бошланганини айтиб, “Minerva City” учун ажратилган ернинг олиб қўйилишини шаҳар ҳокими Жаҳонгир Ортиқхўжаевнинг талабини бажаришдан бош тортгани билан боғлаб тушунтирган эди.

Эслатиб ўтамиз, “Minerva City” учун ер ажратиш ҳақидаги Тошкент вилояти ва Зангиота тумани ҳокимларининг қарорлари амалдаги тартибга зидлиги сабаб суд тартибида бекор қилинган. Инвесторнинг юристи эса ҳокимлар ерни нотўғри ажратган бўлса, бу ерда инвесторнинг айби йўқлигини билдирган.