Янги Тошкентнинг бош режаси Сингапур компанияси билан ҳамкорликда ишлаб чиқилади

Ўзбекистон инвестициялар, саноат ва савдо вазири Лазиз Қудратов Сингапурда Meinhardt Group раиси Шаҳзод Насим билан учрашди. Томонлар давлат-хусусий шериклик тамойиллари асосида қўшма лойиҳаларни, инфратузилмавий лойиҳаларни амалга ошириш масаласи муҳокама қилинди.

Сингапур компанияси раҳбариятига биргаликда ишлаб чиқиш учун таклиф этилаётган истиқболли лойиҳаларнинг тақдимоти ўтказилди. Муҳокама якунида, томонлар қўшма Лойиҳа-инжиниринг марказини ташкил этиш бўйича келишувга эришди.

Марказнинг асосий вазифаси шаҳарсозлик ва саноат соҳаларидаги ташаббусларда илғор тажрибаларни жорий этиш бўлади.

“Янги Тошкент” ақлли шаҳри биринчи босқичи бош режасини ишлаб чиқиш, ҳамда замонавий кимё ва фармацевтика саноат корхоналарини барпо этиш шулар жумласидан. Марказ учун малакали кадрлар Сингапур корхонаси томонидан тайёрланади.

Лазиз Қудратов, шунингдек, Indorama Corporation компанияси директори Пракаш Кежривал билан ҳам учрашди. Учрашувда тўқимачилик ва кимё саноатида янги лойиҳаларни амалга оширишни назарда тутувчи стратегик ҳамкорлик тўғрисидаги битим имзоланди.

Эслатиб ўтамиз, Лазиз Қудратовнинг Сингапур компаниялари билан мазкур келишувлари президент Шавкат Мирзиёвнинг Сингапурга давлат ташрифи арафасида рўй бермоқда.

Маълумот учун, Янги Тошкент пойтахтнинг шарқий қисмида, Чирчиқ ва Қорасув дарёлари оралиғида барпо этилиши, 500 минг аҳолига мўлжалланган бўлиши кўзда тутилмоқда. Биринчи босқичда 6 минг гектарда қурилишлар қилинади.