Педагогика ОТМга қабул икки босқичли имтиҳон орқали амалга оширилиши мумкин

Президентнинг 2022 йил 21 июндаги қарорига асосан, 2024/2025 ўқув йилида тажриба-синов тариқасида Низомий номидаги Тошкент давлат педагогика университетининг педагогика таълим йўналишларига (алоҳида иқтидор талаб этиладиган таълим йўналишлари бундан мустасно) қабул жараёнлари икки босқичда, жумладан биринчи босқичда — дастлабки имтиҳон шаклида, иккинчи босқичда — кириш тест синовлари орқали амалга оширилади. 

Бунда:

• дастлабки имтиҳон ва кириш тест синовлари Давлат тест маркази (ҳозирги номи Билим ва малакаларни баҳолаш агентлиги) томонидан ўтказилади;
• дастлабки имтиҳон доирасида абитуриентларнинг педагогик касбга мойиллиги ўрганилади;
• кириш тест синовларида қатнашишга фақат дастлабки имтиҳондан муваффақиятли ўтган абитуриентларга рухсат этилади.

2024 йил 1 январга қадар Университетнинг педагогика таълим йўналишларига ўқишга қабул қилиш бўйича вақтинчалик тартиб ишлаб чиқилади ва тасдиқланади.

Шунингдек, қарорда тажриба-синов натижаларидан келиб чиқиб, педагогика таълим йўналишларига қабул имтиҳонларини икки босқичда ўтказиш тартибини педагог кадрлар тайёрловчи бошқа олий таълим муассасаларига ҳам татбиқ этиш бўйича Вазирлар Маҳкамасига таклиф киритиш вазифаси белгиланган.