Йўловчи поезд чипталари аввал эълон қилинганидан арзон нархда сотилмоқда

“Ўзтемирйўлйўловчи” АЖ вокзал маълумотхонаси ходимининг Kun.uz’га маълум қилишича, бунда “Шарқ”, “Насаф” тезюрар поездлари учун чипталар 30-35 фоизга, “Афросиёб”ники эса 60 фоизга ошган. “Ноябрдан бошлаб кассаларда шу нархлар асосида чипталар сотилиши айтилган”,– дейди таҳририят мухбири билан гаплашган ходим.

Онлайн кассаларда ҳам суммалар ўзгарганини кўриш мумкин. Мисол учун, 2023 йил 19 июн санасида Тошкент Шимолий вокзалидан Бухоро йўналишида ҳаракатланувчи “Афросиёб” поездининг чипта нархи 173 минг сўм бўлган бўлса, унинг ҳозирги қиймати 280 минг сўм.

Тезюрар поезди билан ҳам ҳолат худди шундай. Тошкент Шимолий вокзалидан Навоийга борадиган “Шарқ” йўловчи поезди учун йўл ҳақи 132 минг 180 сўм бўлган, илгари унинг нархи 92 минг сўм эди.

Тўлдириш: чипта нархлари ўзгаргани бўйича юқоридаги хабар берилгач, "Ўзбекистон темир йўллари" янги тарифларни эълон қилди. Унга кўра:

- маҳаллий йўналишлардаги йўловчи поездлари чипта нархларининг тариф қисми 44% га;
- юқори тезликда ҳаракатланувчи "Афросиёб" электропоездлари чипталари: 

Тошкент — Бухоро — Тошкент

• ВИП 530 000 сўм
• Бизнес 385 000 сўм
• Эконом 280 000 сўм

Тошкент — Қарши — Тошкент 

• ВИП 455 000 сўм
• Бизнес 325 000 сўм
• Эконом 235 000 сўм

Тошкент — Самарқанд — Тошкент 

• ВИП 330 000 сўм
• Бизнес 230 000 сўм
• Эконом 170 000 сўм этиб белгиланди.

Авваллроқ “Ўзбекистон темир йўллари” АЖ нархлар 20 октябрдан мос равишда 50 ва 100 фоизга оширилишини маълум қилганди.

Кейинроқ ташкилот матбуот котиби Алишер Балтабаев бу санадан чипта нархлари оширилмаслигини, ставкалар қайта кўриб чиқилаётгани ва нархлар ўзгариши босқичма-босқич амалга оширилишини айтганди.