Самарқандда бировнинг номига онлайн кредит расмийлаштирган шахс ушланди

Самарқанд вилоятида икки нафар аёлнинг номига фирибгарлик йўли билан кредит олган шахс ушланди. Бу ҳақда ИИВ Киберхавфсизлик маркази хабар бермоқда.

Маълум қилинишича, Самарқанд вилоятида яшовчи У.О. ҳамда Б.Х. ИИБга мурожаат қилиб, уларнинг номига номаълум сабабларга кўра онлайн кредит расмийлаштирилганлигини маълум қилган.

Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Самарқанд вилояти Иштихон туманида яшовчи муқаддам судланган, 28 ёшли А.Ш. содир этгани аниқланган.

Маълум бўлишича, А.Ш. аёлларга қўнғироқ қилган ва ўзини банк оператори сифатида таништириб, СМС-хабарнома (сохта ҳавола) юбориш орқали шахсий маълумотларини қўлга киритган.

Сўнг уларнинг номидан мобил илова орқали рўйхатдан ўтиб, онлайн тарзда 27 млн сўмдан жами 54 млн сўм онлайн кредит расмийлаштириб, ўзининг банк картасига ўтказиб олган.

Қайд этилишича, мазкур ҳолат юзасидан Жиноят кодексининг 168-моддаси 3-қисми "б" банди билан жиноят иши қўзғатилиб, А.Ш.нинг фош этилмаган шу турдаги бошқа жиноятларга алоқадорлигини текшириш юзасидан тезкор-суриштирув ишлари олиб борилмоқда.

Маълумот учун, қонунга мувофиқ, Жиноят кодексининг 168-моддаси 3-қисми "б" бандидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.