Сув босган Орскда ёрдам талаб қилган аҳоли митингга чиқди

Оренбург вилояти Орск шаҳрининг юзлаб аҳолиси маҳаллий тўғон ёрилиши оқибатида бир қанча ҳудудлар сув остида қолганидан кейин шаҳар марказида норозилик намойиши ўтказди. 8 апрел, душанба куни улар сув тошқинидан жабрланганларга тўловларни оширишни талаб этди ва маҳаллий ҳокимиятни танқид қилди.

Намойишчилар тўловлар ҳажмидан норозилигини билдирди, шунингдек, тўғон фалокатга сабаб бўлган қоидабузарликлар билан қурилганини айтишди. «Осторожно, новости» Telegram-каналига кўра, йиғилганлар Россия президенти Владимир Путинга ёрдам сўраб мурожаатнома ёзган.

"Путин, помоги!" - с такими лозунгами жители российского Орска вышли на митинг. Они недовольны размером выплат пострадавшим от наводнения. К ним приехал мэр города. Беседа получилась эмоциональной pic.twitter.com/cRRaHDCZ0y

— DW на русском (@dw_russian) April 8, 2024

Расмийлар аҳолини табиий офат оқибатларини мустақил бартараф этишга чақирди

Маҳаллий Telegram-каналлари хабарига кўра, полиция митинг ўтказилишига халақит берган, хавфсизлик кучлари эса йиғилганларни унинг ноқонунийлиги ҳақида огоҳлантирган. Кейинчалик намойишчилар сони ортиб, шаҳар раҳбари Василий Козупица уларнинг олдига келиб, шаҳар маъмуриятида музокаралар ўтказиш учун ташаббус гуруҳи тузишни таклиф қилди. Намойишчиларнинг бир неча вакиллари билан учрашувда шаҳар ҳокими етказилган зарарни баҳолаш ва товон миқдорини аниқлаш бўйича комиссия ташкил этилишини, шунингдек, уй-жой қурилиши учун тўловларни ваъда қилди. 

Бундан ташқари, вилоят губернатори Денис Паслер жабрланган аҳоли билан учрашди. У телефонларни ўчириб, шикоят қилмасликни, аксинча, сув тошқини оқибатларини бартараф этишда бирдамлик ва ватанпарварлик кўрсатишни талаб қилди, деб ёзади «7х7 – Горизонтальная Россия» нашри. Паслер жабрланганларни ўз ҳисобидан қутқараётган одамларга ишора қилиб, уларни «ҳақиқий ватанпарварлар» деб атади. Йигирмага яқин маҳаллий аҳоли иштирок этган йиғилишдан сўнг ҳокимият 2025 йилда янги тўғон қурилиши учун маблағ ажратишга ваъда берди. Бундан ташқари, янги йиғилиш ўтказилиши режалаштирилган, унда иш натижалари эълон қилинади, деб ёзади «Осторожно, новости».

Ушбу нашрга кўра, митинг натижасида қўлга олинганлар бўлмаган. Аввалроқ Оренбург вилояти прокуратураси ушбу воқеа расмийлар билан келишилмагани ҳақида хабар эълон қилган эди. Шунингдек, у унда иштирок этиш учун жавобгарлик ҳақида огоҳлантирди. 

Илек қишлоғи яқинида сув сатҳи хавфли даражадан ошиб кетган 

Айни пайтда, Илек қишлоғида жойлашган Урал дарёсидаги сув сатҳи прогноздан эртароқ хавфли даражадан ошиб кетди. «Илек туманида 8 апрел 16:00 ҳолатига кўра, Илек қишлоғида Урал дарёси сатҳи 892 смга етди», — дейилади туман ҳокимлигининг Telegram’даги хабарида. Ушбу маълумотларга кўра, айни пайтда Илек қишлоғида Урал дарёсидан тўғонни мустаҳкамлаш ва кенгайтириш ишлари олиб борилмоқда. 

Вилоят маркази ҳудудида ҳам сув сатҳи фаол равишда кўтарилиб, хавфли даражага яқинлашди. «Оренбург Гидрометеорология маркази маълумотларига кўра, 8 апрел куни соат 14:00 да сув сатҳи кўтарилган. Эрталабки соат 8 дан бошлаб Урал дарёси 21 сантиметрга кўтарилди ва 893 сантиметрни ташкил этди», - дея маълум қилди Оренбург мэрияси. Расмийларга кўра, вазият кейинги икки кун ичида фақат ёмонлашади. «Тошқин зонасида жойлашган оренбургликлар уйини тарк этиши керак», - дейди вилоят ҳокимияти. 

10 апрелда тошқин энг юқори чўққисига чиқиши кутилмоқда

Оренбург вилоятида 10 апрелда кутилаётган сув тошқинининг энг юқори чўққисида бир қатор аҳоли пунктлари сув тошқини зонасида бўлади, деб ёзади «Интерфакс» губернатор матбуот хизмати ва Рогидромецентрга таяниб. Шунингдек, ҳозирда Оренбургда икки мингга яқин уй сув остида қолгани, сўнгги бир кунда уларнинг сони қарийб икки юзтага кўпайгани, улар орасида 8500 дан ортиқ томорқа ерлари борлиги қайд этилган. 8 апрел куни эрталаб вилоятда 10 мингдан ортиқ уй ва 20 мингга яқин томорқа ерлари сув остида қолган.

6000 дан ортиқ одам эвакуация қилинди, улардан 1500 га яқини болалар, 1200 дан ортиқ эвакуация қилинганлар вақтинчалик жойлаштириш марказларида бўлиб турибди. «Ириклин сув омборидан Илек қишлоғигача бўлган Урал дарёси бўйида вазият 25 апрелдан олдин нормаллашиши кутилмаяпти», — дея қўшимча қилди губернатор. 

Оренбург вилоятида сув тошқини 

8 апрел куни 90 минг аҳолига эга Оренбург вилоятининг Новотроицк шаҳрида ҳимоя тўғонидан сув тошиб кетди. Тўғон 1957 йилда катта тошқиндан кейин қурилган ва шаҳар ҳудудини тошқин даврида Сазане кўлини тўлдирадиган сувдан ҳимоя қилади. Сув сатҳи 8,5 метрни ташкил этади, деб хабар беради «Интерфакс». 

4 апрелдан бошлаб минтақада сув тошқини билан боғлиқ вазият ёмонлашгани сабабли минтақавий фавқулодда ҳолат режими, 7 апрелдан федерал фавқулодда ҳолат режими жорий этилди. Маҳаллий ҳокимият Оренбург вилоятининг Орск шаҳридаги вазиятни оғир деб баҳоламоқда. 7 апрел куни эрталаб губернатор ва вилоят ҳукумати матбуот хизмати Оренбург вилоятидаги сув тошқини билан боғлиқ вазият «энг ёмон сценарий бўйича ривожланаётганини» маълум қилди.