Илк бор барча депутатлик ўринларига 5 та партия томонидан 100 фоиз номзодлар кўрсатилди

20 сентябрь куни бўлиб ўтган Марказий сайлов комиссиясининг йиғилишида Қонунчилик палатаси депутатлигига сиёсий партиялар томонидан кўрсатилган номзодларни рўйхатга олиш ва сайловолди ташвиқотига оид муҳим масалалар кўриб чиқилди.

Маълумотларга кўра, бу йилги сайловда 5 та сиёсий партия – Ўзбекистон Либерал-демократик партияси, «Миллий тикланиш» демократик партияси, Экологик партия, Халқ демократик партияси ва «Адолат» социал-демократик партияси томонидан барча депутатлик ўринларига 100 фоиз номзодлар кўрсатилган.

Мазкур партиялар бир мандатли сайлов округлари бўйича 375 нафар, ягона сайлов округи бўйича эса 500 нафар номзодни рўйхатга олишга муваффақ бўлди. Қонунчилик палатасига жами 875 нафар номзод кўрсатилган. Бу миллий сайлов тарихида биринчи марта рўй бермоқда.

Йиғилишда қайд этилганидек, номзодлар таркибида инклюзивлик, яъни ногиронлиги бўлган шахслар сони ҳам кўпайган. Бу йил Қонунчилик палатасига 11 нафар, маҳаллий Кенгашларга эса 605 нафар ногиронлиги бор шахслар номзод сифатида кўрсатилди.

Сайловолди ташвиқоти 22 сентябрдан бошланиб, партиялар оммавий ахборот воситаларида чиқишлари учун тегишли тартибда вақт ажратилади. Бу йил сиёсий партиялар сунъий интеллект технологияларидан фойдаланган ҳолда ташвиқот материалларини тайёрлашлари мумкин бўлади. Аммо бунинг учун сунъий интеллектдан фойдаланганлик ҳақида маълумотлар берилиши шарт.

Сайловда иштирок этаётган номзодлар орасида 44,7 фоизини аёллар ташкил этмоқда. Бу энг юқори кўрсаткичлардан бири бўлди. Номзодларнинг ўртача ёши эса 47,2 ёш бўлиб, уларнинг 44,2 фоизи 45 ёшгача бўлганлардир.

Марказий сайлов комиссияси сайлов жараёнларининг тўлиқ шаффоф ва адолатли ўтишига кафолат беришини маълум қилди.