Андижонда ишчидан алиментдан қарзини ушлаб қолмаган фермер жаримага тортилди 

Андижон вилояти Улуғнор туманида ишчисининг маошидан алимент қарзини ушлаб қолмаган раҳбар жаримага тортилиб, машинаси хатланган. Бу ҳақда МИБ вилоят бошқармаси хабар бермоқда. 

Маълум қилинишича, Улуғнор туманида яшовчи М.А. суд қарорига асосан икки нафар фарзанди учун алимент тўлаб бориши белгиланган бўлиб, алимент қарзи ва тўловлари унинг иш ҳақига қаратилган. 
Бу бўйича МИБнинг Улуғнор туман бўлими давлат ижрочиси томонидан алимент тўловчи  М.А.нинг иш жойи, яъни фермер хўжалиги раҳбарига талабнома юборилган. 

Бироқ фермер хўжалиги раҳбари давлат ижрочисининг қонуний талабларини бажармасдан, алимент пулларини қарздорнинг иш ҳақи даромадларидан ушлаб қолмаган.  

Шу сабабли, бюронинг Улуғнор туман бўлими томонидан фермер хўжалиги раҳбари М.Т. базавий ҳисоблаш миқдорининг 10 баравари миқдорида 3 750 000 сўм жарима жазосига тортилган. 
 
Қайд этилишича, ижро ҳаракатлари давомида М.Т.га тегишли Damas машинаси хатланиш жараёнида жарима пуллари тўлиқ ундирилган. Фермер хўжалиги раҳбари ишчисининг октябр ойи иш ҳақи тўловларидан алимент қарзи учун маблағлар ўтказилишини билдирган.