26 ноябр янгиликлари: Ўзбекистонда рўй берган муҳим воқеа ва ҳодисалар

БААдаги қотиллик учун Исроил элчисига ҳамдардлик, видеоси учун судланган сурхондарёлик блогер, шамол электр станцияси борасида янги битим — кун давомида Kun.uz’да ёритилган Ўзбекистон янгиликлари билан таништирамиз.

Исроил элчисига ҳамдардлик

Ўзбекистон ташқи ишлар вазири Бахтиёр Саидов БААда ўлдирилгани гумон қилинаётган исроиллик раввин Цви Коганнинг вафоти муносабати билан Исроилнинг Ўзбекистондаги элчиси Гидеон Лустиг билан учрашиб, чуқур ҳамдардлик билдирди.

Бахтиёр Саидов учрашувда Ўзбекистоннинг миллатчиликка қарши қатъий позициясини таъкидлаб, терроризм ва экстремизмнинг чегара ёки миллати йўқлигини қайд этди. Шунингдек, у Ўзбекистон ҳукумати БАА ва Исроил идоралари билан жиноятни тергов қилишда яқин ҳамкорлик қилаётганини маълум қилди.

Цви Коган Исроил ва Молдова фуқароси бўлиб, БААда резидент раввин сифатида фаолият юритган. Унинг жасади 21 ноябр куни Ал-Айн амирлигида қотиллик аломатлари билан топилган. БАА ИИВ ушбу жиноятда уч нафар Ўзбекистон фуқаросини гумон қилиб қўлга олган. Исроил матбуотига кўра, «Моссад» гумондорларни Эрон билан боғлиқ гуруҳга алоқадор деб ҳисобламоқда.

Эрта никоҳ видеоси блогерни судга олиб борди

Сурхондарё вилоятида ижтимоий тармоққа эрта никоҳни тарғиб қилувчи видео жойлаштирган блогер ёлғон ахборот тарқатиш айби билан жазоланди.

У тайёрлаган видеода эри 17 ёш, хотини 15 ёш бўлса-да, уларнинг эгизак фарзанди борлиги айтилган. Болалар омбудсмани маълумотига кўра, видео саҳналаштирилган бўлиб чиқди.

21 ноябр куни блогер А.Ш. ва видеонинг бошқа иштирокчилари, Ж.Н. ва С.Р. мазкур видеони тайёрлаган. Термиз шаҳри суди томонидан А.Ш.нинг хатти-ҳаракатлари кўриб чиқилди ва Маъмурий жавобгарлик тўғрисидаги кодекснинг 202-2-моддасида кўрсатилган ҳаракат — ёлғон ахборот тарқатгани учун 1 млн 480 минг сўм жарима жазоси тайинланди.

Видеодаги бошқа иштирокчилар эса бундай номақбул хатти-ҳаракатларни такрорламаслик бўйича огоҳлантирилди.

Оиладаги зўравонликка қарши кураш

Ўзбекистонда 2024 йилнинг январ-октябр ойлари давомида оиладаги зўравонлик учун 15 427 киши маъмурий жавобгарликка, 399 киши эса жиноий жавобгарликка тортилди.

Маъмурий жавобгарликка тортилганларнинг 9210 нафарига жарима, 6217 нафарига маъмурий қамоқ жазоси тайинланган. Бу ҳолатларда Маъмурий жавобгарлик тўғрисидаги кодекснинг 59−2-моддаси қўлланган. Ушбу модда оила аъзоларига нисбатан қасддан шикаст етказиш ёки таҳқирлаш учун жазо чораларини кўзда тутади.

399 шахс эса Жиноят кодексининг 126−1-моддаси бўйича судланган. Улардан 126 нафари озодликдан маҳрум қилинган, 255 нафарига эса озодликдан маҳрум қилиш билан боғлиқ бўлмаган жазо чоралари қўлланган. Қолган 18 нафар шахсга шартли ҳукм тайинланган.

Ҳужжатларга кўра, оиладаги зўравонликка қарши қатъий чоралар кўришга қаратилган қонунлар нафақат зўравонлик ҳолатларининг олдини олиш, балки ҳуқуқбузарларнинг янада оғир жиноят содир этишига йўл қўймаслик учун ҳам ишлаб чиқилган.

Тоза энергия ва янги иш ўринлари

Ўзбекистон ва БААнинг Masdar компанияси ўртасида Мингбулоқ шамол электр станциясини қуриш бўйича келишув имзоланди. Бу қурилиш вақтида 1000 та, фойдаланиш даврида эса 60 та иш ўрни яратишини ва 300 минг хонадонни тоза энергия билан таъминлашини назарда тутади.

Мазкур келишув Бокуда ўтказилган COP29 тадбирлари доирасида имзоланган. Бу Masdar ва Ўзбекистон ўртасидаги стратегик шерикликнинг муҳим босқичидир. Лойиҳа Ўзбекистонда қайта тикланадиган энергия манбаларини ривожлантириш бўйича кенгроқ стратегиянинг биринчи босқичи ҳисобланади.

Prnewswire маълумотига кўра, Masdar 2022 йилда 2 GW қувватга эга шамол лойиҳалари бўйича келишувлар имзолаган. Мингбулоқ ШЭСдан ташқари, компания Қорақалпоғистондаги Ақпетки ва Навоий вилоятидаги Бузовбой станцияларини ҳам амалга оширади.

БАА энергетика вазири Суҳайл бин Муҳаммад ал-Мазруий, бу ҳамкорлик Ўзбекистонда ва хорижда тоза энергияни ривожлантиришга ёрдам бериши ҳақида таъкидлади.

Бухорода оқова сувларни қайта ишлашга янги қадам

Хитойнинг PK Envoronment Corp. компанияси Бухорода оқова сувларни қайта ишлаш ва қайта фойдаланиш бўйича экологик хавфсиз лойиҳа амалга оширишни режалаштирмоқда.

Компания ўз лойиҳаларида инновацион «яшил» технологиялардан фойдаланиб, маҳаллий аҳоли ва табиатга зарар етказмасликка аҳамият қаратади.

Музокаралар давомида Бухоро вилоятида чиқиндиларни зарарсизлантириш ва қайта ишлатиладиган сув ресурслари яратиш бўйича истиқболли режалар муҳокама қилинди.

Компания мутахассислари вилоят ҳолатини ўрганиш учун Ўзбекистонга ташриф буюришга келишиб олди.

Ўзбекистоннинг Хитойнинг Гуангжоу шаҳридаги Бош консулхонаси ва компания ўртасидаги учрашув чет эл капитали асосида истиқболли лойиҳаларни ривожлантириш мақсадида ташкил этилди.