РФ террорчилар рўйхатига киритиш учун асосларни кенгайтирмоқда

Россияда фуқароларни экстремистик фаолият ёки терроризмга алоқадор шахслар ва ташкилотлар рўйхатига киритиш учун асослар кенгайтирилади. 12 декабр, пайшанба куни Давлат думаси тегишли қонун лойиҳасини иккинчи ва учинчи ўқишда қабул қилди.

Экстремистлар ва террорчилар рўйхатига киритиш учун янги асослар

Хусусан, нацистлар рамзлари ёки экстремистик ташкилотларнинг рамзларини тарғиб этиш, намойиш қилиш бўйича суднинг қонуний кучга кирган айблов ҳукми бундай асос ҳисобланади, деб ёзади ТАСС. Бундан ташқари, Россия армияси ҳақида «фейк» маълумотларни оммавий равишда тарқатишда ёки Россия Қуролли кучларини обрўсизлантиришда айбланган фуқаролар экстремистлар ва террорчилар рўйхатига қўшилиши мумкин.

Экстремистлар ва террорчилар рўйхатига қотиллик, соғликка ўртача ва оғир шикаст етказиш, қийноқлар ва «диний/сиёсий адоват асосида» безорилик қилишда гумонланган ва судланганлар ҳам киритилади. Шу пайтгача фақат экстремистик ва террорчилик фаолияти бўйича иш қўзғатилган фуқаролар рўйхатга киритилган эди.

Москвадаги ҳарбий суд терроризм бўйича деярли барча ишларни яширди

Москвадаги 2-ғарбий округ ҳарбий суди сайтидан Россия Федерацияси Жиноят кодексининг «террористик» моддалари билан боғлиқ ишлар бўйича юзлаб карточкалар йўқолиб қолди. 9 декабр куни «Осторожно, новости» Telegram-каналида маълум қилинишича, 2024 йил сентябр ойи бошидан бери биринчи инстанция жиноят ишлари базасида бор-йўғи учта карточка қолган. Улардан иккитаси давлатга хиёнатда айбловлар билан боғлиқ. «Осторожно, новости»нинг қайд этишича, аслида бу суд шунга ўхшаш яна кўплаб ишларни кўриб чиқмоқда. Москва ва Россиянинг марказий қисмида терроризмга оид барча ҳолатлар унинг юрисдикциясида жойлашган.

DW маълум қилишича, 10 декабр куни эрталаб бутун жорий йил давомида суд веб-сайтидаги биринчи инстанция жиноят ишлари файлида 20 та ёзув мавжуд. Улардан 12 таси бўйича суд ҳукми чиқарилган, биттаси прокурорга қайтарилган. Еттита иш очиқ бўлиб, уларнинг тўрттасида судланувчилар ҳақидаги бўлимда «маълумотлар беркитилган» дейилган.

Очиқ ишлар терроризм (Россия Федерацияси Жиноят кодексининг 205-моддаси), қисмни рухсатсиз ташлаб кетиш (337-модда), давлатга хиёнат (275-модда), маст ҳолда транспорт воситасини бошқариш (264-модданинг 4-қисми), мулкни ўзлаштириш (160-модда 4-қисм) билан боғлиқ.