Трамп Маскнинг АҚШга H-1B визалари бўйича талабига рози бўлди

АҚШнинг сайланган президенти Доналд Трамп АҚШга малакали ишчиларни жалб қилиш учун H-1B дастурини сақлаб қолишни талаб қилган миллиардер Илон Маскнинг фикрига қўшилди. Бу ҳақда Трампнинг 28 декабр, шанба куни чоп этилган консерватив The New York Post газетасига берган интервюсида айтилган.

Маск H-1B дастури учун 

Сайлов кампанияси давомида Трамп бошчилигидаги республикачилар АҚШнинг иммиграция сиёсатини кучайтириш режалари ҳақида гапирди. Улар орасида консерваторлар H-1B дастуридан воз кечишни талаб қилмоқда. Масалан, Трампнинг собиқ маслаҳатчиси Стив Бэннон ўзининг подкастида «H1-B визаси дастури юқоридан пастгача тўлиқ фирибгарликдир», деди.

Илон Маск дастурни ҳимоя қилди. «Америкага SpaceX, Tesla ва мамлакатни кучли қилган юзлаб бошқа компанияларни қурган жуда кўп ноёб одамлар билан бирга келганимнинг сабаби H1-B. Бу масала бўйича мен охиригача тураман», — деб ёзди миллиардер шанба куни X ижтимоий тармоғида.

Трамп Маскнинг фикрига қўшилди

Трамп The New York Post нашрига юқори малакали ишчилар учун иммиграцион визаларни қўллаб-қувватлашини айтди. «Мен ҳар доим визаларни яхши кўрганман, мен ҳар доим виза тарафдори бўлганман, - деди республикачи. Менга тегишли фирмаларда H-1B визаси эгалари кўп. Мен H-1B тарафдори бўлганман ва ҳозир ҳам шундайман. Бу яхши дастур».

The New York Post газетасининг эслатишича, Трамп аввалроқ «биринчи маъмуриятида хорижлик ишчилар учун виза олиш имкониятини чеклаб қўйган ва дастурни танқид қилган». AFP таъкидлаганидек, Трамп H-1B визасини «америкалик ишчилар учун жуда адолатсиз» деб атади. У қўйган чекловлар Жо Байден даврида олиб ташланган.

ОАВ: Трамп Панама каналини олишга жиддий қарор қилган

25 декабр куни The Wall Street Journal нашрида чоп этилган таҳририят мақоласига кўра, АҚШнинг сайланган президенти Доналд Трампнинг Вашингтондан Панама канали учун ортиқча тарифлар ундирилаётгани ҳақидаги даъволари асоссиз ва жиддий оқибатларга олиб келиши мумкин. 

«Трампнинг Панама америкаликларни ўғирлаяпти деган даъвоси ҳеч қандай асосга эга эмас. Ҳар бир кема, ўз байроғидан қатъи назар, тоннаж ва турига қараб бир хил тариф тўлайди», — деб ёзади материал муаллифлари. Уларнинг таъкидлашича, 1999 йилда каналнинг Панамага ўтказилиши мамлакат «муҳим транзит йўналишини бошқаришга қодир эмас» деган хавотир билан бирга келган. «Аммо Панама канали раҳбарияти ҳукуматдан институционал мустақилликни сақлаб, бизнес тамойиллари асосида фаолият юритиб, яхши натижаларга эришди», дейилади мақолада.

Консерватив New York Post (NYP) Трамп атрофидаги манбаларга таяниб, 23 декабр, душанба куни Трамп Гренландия ва Панама каналини олишга жиддий ёндашгани ҳақида хабар берди. «Президент 100 фоиз жиддий қарор қилган», деди нашр суҳбатдошларидан бири. Бошқа NYP манбаларининг таъкидлашича, Трамп Гренландия ва Панама канали ҳақида гап кетганда, Россия ва Хитойга қарши курашда «Америка ҳаммасидан устун» стратегиясининг бир қисми сифатида ҳазиллашмаяпти.