Полша Венгрия элчисига таклифномани қайтариб олди

Полша Венгриянинг Варшавадаги элчиси Иштван Ийдяртонинг 3 январ оқшомида Европа Иттифоқига Полша раислигининг очилиш маросимида иштирок этишини номақбул деб ҳисоблади. Полша ташқи ишлар вазирлиги Будапештга тегишли нота юборди, деб хабар берди Полшанинг Onet.pl портали.

Қарор Венгрия Полша адлия вазирининг собиқ ўринбосари Марчин Романовскийга бошпана бергани фонида қабул қилинган, унга қарши ватанида коррупция айблови бўйича жиноий иш очилган.

Раисликнинг расмий бошланиши Болшой театр — Варшава миллий операсида бўлиб ўтади. Тадбирда Полша бош вазири Доналд Туск, Европа кенгашининг янги раҳбари Антониу Кошта, шунингдек, Варшавадаги миссиялар дипломатлари иштирок этиши кутилмоқда.

Полша ташқи ишлар вазирлиги раҳбари Радослав Сикорский Венгрия элчихонасига нота юборди. Ундан келиб чиқадики, Ийдяртонинг иштироки «кўзда тутилмаган».

Эҳтимол, Будапешт қуйироқ даражадаги дипломат юборади, аммо бу ҳали тасдиқланмаган.

Дастлаб, Венгрия элчиси бир неча ҳафта олдин гала-концертга таклиф қилинган ва ҳатто унинг иштирок этиши тасдиқлаганди.

Полша собиқ амалдорига Венгрияда бошпана берилганидан норози

Венгриянинг ўз ватанида коррупцияда айбланиб жиноий иш очилган Полша адлия вазирининг собиқ ўринбосари Марчин Романовскийга бошпана бериш қарори Варшаванинг норозилигига сабаб бўлди. Бу ҳақда 20 декабр куни Полша ташқи ишлар вазири Радослав Сикорский маълум қилди.

«Биз Виктор Орбан ҳукуматининг жиноятда гумон қилинаётган ва Европа ҳибсга олиш ордери билан қидирувда бўлган Романовскийга сиёсий бошпана бериш тўғрисидаги қарорини Полша Республикасига ва Европа Иттифоқи тамойилларига нисбатан душман ҳаракати деб биламиз», — дейилади Полша ташқи ишлар вазирлиги раҳбарининг X ижтимоий тармоғида.

Венгрия бош вазири Орбан маъмурияти раҳбари Романовскийга бошпана берилишини унинг иши сиёсий мотивлар борлиги билан оқлади. «Бош вазир Доналд Туск ҳукуматининг хатти-ҳаракатлари Полша ҳукумати Конституциявий суд қарорларини эътиборсиз қолдирадиган ва жиноий қонунчиликдан сиёсий рақибларга қарши восита сифатида фойдаланадиган вазиятни яратди», — дея Венгрия расмийсининг сўзларидан иқтибос келтирмоқда dpa.

Варшава бу айбловларни рад этди ва Будапештдаги элчисини номаълум муддатга чақириб олди. Бундан ташқари, Венгриянинг Варшавадаги элчиси Полша Ташқи ишлар вазирлигига чақирилиб, унга норозилик нотаси топширилди.