Қозоғистон Ўзбекистонга олиб чиқувчи янги темирйўлни 2027 йилда ишга туширмоқчи

Қозоғистон 2027 йилда Ўзбекистонга уланувчи янги темирйўлни фойдаланишга топширмоқчи. Қиймати салкам 550 млн доллар бўлган Дарвоза–Мақтаорол линияси Сариоғоч–Тошкент линиясига муқобил йўл бўлиб, Сариоғоч станциясидаги юкламани камайтиради, дея маълум қилди “Қозостон темирйўллари”.

Фото: Қозоғистон ҳукумати матбуот хизмати

Компания ахборотига кўра, қурилиш ишларига 46 та йўл-қурилиш техникаси ва 70 дан ортиқ ходим жалб этилган.

Лойиҳа доирасида 203 км масофада релс-шпал панжараларини йиғиш кўзда тутилган бўлиб, ҳозир 100 км масофада бу ишлар якунланган. Режадаги 9,5 млн куб тупроқ ишларининг 1,4 млн куби (15 фоиз) бажариб бўлинган.

Дарвоза–Мақтаорол темирйўли Ўзбекистон ва Қозоғистонни яқинлаштиришдан ташқари, Туркистон вилоятининг икки олис тумани – Мақтаорол ва Жетисойни Қозоғистоннинг бошқа қисмлари билан боғлайди.

Фото: Қозоғистон ҳукумати матбуот хизмати

Қиймати 286 млрд тенге (545,8 млн доллар) бўлган лойиҳани “Қозоғистон темир йўллари” (“Самрук-Хазина”нинг портфел компанияси) амалга оширмоқда.

Қурилиши 2023 йилда бошланган лойиҳа доирасида 9 та темирйўл станцияси ҳамда Қозоғистон–Ўзбекистон чегарасида янги ўтказиш пункти очилиши кўзда тутилган.

Эслатиб ўтамиз, 2024 йилнинг сўнгги кунларида «Хитой – Қирғизистон – Ўзбекистон» темирйўли қурилишига старт берилганди.

#Қозоғистон #Марказий Осиё #темирйўл