Шавкат Мирзиёевнинг БААга расмий ташрифи якунланди

Ўзбекистон президенти Абу-Даби шаҳрида БАА президенти Шайх Муҳаммад бин Зоид Ол Наҳаён билан самарали музокаралар ҳамда ушбу мамлакатнинг етакчи давлат ташкилотлари, компания ва банклари раҳбарлари билан учрашувлар ўтказди.

Шавкат Мирзиёевнинг Бирлашган Араб Амирликларига расмий ташрифи доирасидаги тадбирлар якунига етди. Бу ҳақда Президент матбуот хизмати хабар берди.

Ўзбекистон етакчиси амирликлар пойтахти Абу-Даби шаҳрида БАА президенти Шайх Муҳаммад бин Зоид Ол Наҳаён билан самарали музокаралар ҳамда ушбу мамлакатнинг етакчи давлат ташкилотлари, компания ва банклари раҳбарлари билан учрашувлар ўтказди.

Музокаралар якунида икки томонлама ҳужжатлар тўплами, шу жумладан, Стратегик шериклик ўрнатиш тўғрисида декларация қабул қилинди.

Давлат раҳбари «Абу-Даби барқарор ривожланиш ҳафталиги» халқаро саммити очилиши ҳамда барқарор ривожланиш соҳасидаги Шайх Зоид номидаги мукофотни топшириш маросимида иштирок этди, саммитнинг ялпи мажлисида қатор муҳим ташаббусларни илгари сурди.

Бугун Дубай шаҳрида Бирлашган Араб Амирликлари вице-президенти, бош вазири, Дубай амири Шайх Муҳаммад бин Рошид Ол Мактум билан музокаралар бўлиб ўтди.

Ташриф якунида Дубай халқаро аэропортида олий мартабали меҳмонни Дубай фуқаро авиацияси бошқармаси президенти, Emirates компаниялар гуруҳи раиси ва бош директори Шайх Аҳмад бин Саид Ол Мактум ва БАА ҳукумат ишлари бўйича вазири Муҳаммад бин Абдулла ал-Гаргавий кузатиб қўйди.

Ўзбекистон президенти Тошкентга жўнаб кетди.

#БАА #Абу-Даби #Шавкат Мирзиёев