Тошкент шаҳрида ҳаво сифати яна бир муддат пасайди

Айниқса, қиш ойларида ҳаводаги PM2.5 заррачалари концентрацияси халқаро меъёрлардан анча юқори бўлиб, бу аҳоли саломатлигига жиддий хавф туғдиради.  

Бугун, 16 январ куни кечки пайт ҳаво сифати индекси (AQI) 230 га етгани кузатилган, бу эса жуда носоғлом кўрсаткич ҳисобланади. Бу борада Тошкент дунёнинг ҳавоси энг ифлос шаҳарлари рейтингида Ҳиндистон пойтахти Деҳлини ортда қолдириб, 1-ўринга чиқиб олди. 

Ҳаво сифати пасайишида қурилиш чанглари, автотранспорт воситаларидан чиқадиган зарарли газлар ва саноат корхоналарининг чиқиндилари асосий омиллардан бири ҳисобланади. Шунингдек, шаҳар атрофидаги дарахтларнинг кесилиши ва яшил майдонларнинг камайиши ҳам ҳаво ифлосланишига салбий таъсир кўрсатмоқда.  

Мутасадди ташкилотлар томонидан ҳаво сифати яхшилаш мақсадида қатор чора-тадбирлар режалаштирилган. Жумладан, қурилиш майдонларида ҳавони муҳофаза қилиш талабларига риоя қилиш, автотранспорт воситаларининг экологик стандартларга мослигини таъминлаш, саноат корхоналарида замонавий чанг-газ тозалаш ускуналарини ўрнатиш ва шаҳар атрофида «яшил белбоғлар» яратиш каби ишлар амалга оширилиши режалаштирилган.  

Шу билан бирга, аҳолига ҳаво сифати ёмонлашган кунларда кўчадаги фаолиятни чеклаш, ниқоблардан фойдаланиш ва уй шароитида ҳаво тозалагичлардан фойдаланиш тавсия этилмоқда. 

Ҳаво сифати ҳақидаги маълумотларни реал вақт режимида кузатиб бориш учун махсус онлайн платформалар ишга туширилган.