AQSh senatida Suriyaga zarbalarni noqonuniy deb atashdi

Foto: AP Photo / Evan Vucci

AQSh senatori Tim Keyn Suriyaga zarbalarni noqonuniy deb atadi, sababi unga kongress tomonidan ruxsat olinmagan.

"Prezident Donald Trampning Suriyaga aviazarbalar berish haqidagi kongress tasdiqlovidan o‘tmagan qarori noqonuniy. Biz prezidentga urush olib borishga kart-blansh berishni to‘xtatishimiz zarur. Bugun bu Suriya, biroq uni keyingi safar Eron yoki Shimoliy Koreyani bombardimon qilishdan nima to‘xtatib qoladi?" – deya yozgan Keyn Twitter’da.

Keyn 2016 yilda AQSh vitse-prezidentligiga Demokratik partiyadan o‘z nomzodini qo‘ydi, prezident lavozimiga esa Hillari Klinton nomzod bo‘lgandi.

AQSh Konstitutsiyasining birinchi moddasiga ko‘ra, prezidentga urush olib borishga ruxsat kongress tomonidan berilishi kerak. Biroq AQSh mudofaa vaziri Jyeyms Mettis Suriyaga zarba berishga ikkinchi modda asos bo‘lganini aytdi, unda prezidentga AQSh “jiddiy tahdidlariga”, jumladan harbiy yo‘l bilan ham reaksiya bildirish huquqi beriladi.

#AQSh #Suriya

AQSh prezidenti Donald Tramp 14 aprel kuni Suriyaga nisbatan raketa hujumi boshlanganini bildirdi. AQSh va uning ittifoqchilari Suriyada kimyoviy qurollar ishlatilishiga javoban Asad hukumatiga qarshi harbiy amaliyot o‘tkazmoqda.