O‘zbek kinosi darg‘alaridan biri Shuhrat Abbosov olamdan o‘tdi

Bugun, 25 aprel kuni o‘zbek kinosi darg‘alaridan biri bo‘lmish mashhur ijodkor, milliy kinoimizda sermahsul ijod qilgan Shuhrat Abbosov olamdan o‘tdi.

KUN.UZ’ga kelib tushgan ma'lumotlarga ko‘ra, rejissyor 7 apreldan buyon buyrak yetishmovchiligi, animiya va yurak yetishmovchiligi kasalliklari bilan birinchi respublika statsionar shifoxonasida davolanib kelmoqda edi.

O‘zbek kinosida o‘zgacha yangilik qilgan, o‘z yo‘nalishi bo‘yicha alohida o‘rin egallagan, “Mahallada duv-duv gap” (1960), “Sen yetim emassan” (1962), “Toshkent – non shahri” (1967), “Abu Rayhon Beruniy” (1974), “Olovli yo‘llar” (1977-1985), “Otamdan qolgan dalalar” (1997), “Dilor, Dilor, dil va or” (2015), “Yana mahallada duv-duv gap” (2016-2017) filmlariga rejissyorlik qilgan Shuhrat Abbosov bugun, 25 aprel kuni, soat 18:00 da olamdan o‘tgan.

KUN.UZ tahririyati o‘zbek kino olamining darg‘asi bo‘lmish Shuhrat Abbosovning vafoti sabab u kishining oila a'zolari va yaqinlariga chuqur hamdardlik bildiradi.