Hyundai vodorodda yuruvchi yuk mashinasining ilk suratini namoyish qildi

Hyundai markasi vodorod yonilg‘i elementlariga ega elektr dvigatelda harakatlanuvchi yuk mashinasining ilk suratini namoyish qildi. Ushbu modelni Yevropada 2019 yilda sotuvga chiqarish rejalashtirilmoqda. 

Janubiy Koreyaning avtomobilsozlik kompaniyasi ekologik yuk mashinasini yaratish haqidagi rejalari bilan Gannoverdagi xalqaro tijorat transporti ko‘rgazmasida o‘rtoqlashdi. Kompaniya vakili 2019 yilda mashinaning barcha texnik ko‘rsatkichlari oshkor qilinishiga va'da berdi. 

Hozircha esa yangi mashina Hyundai tijorat transporti qatorining boshqa “vakillari”dan farq qilishigina ma'lum. Jumladan, yuk mashinasi radiatoridagi surat vodorodni ifodalaydi, aerodinamik samaradorlikka esa mashina tomidagi spoyler hamda kabina va yarimtirkama o‘rtasidagi detallar javob beradi.

Hyundai modellari orasida vodorodda harakatlanuvchi avtomobillar mavjud, bular: iX35 Fuel Cell va NEXO krossoverlari. NEXO yanvardagi CES ko‘rgazmasida debyut qilgan. Yo‘ltanlamas 120 kilovattli (163 ot kuchi) elektromotor bilan jihozlangan. Motor vodorod yonilg‘i elementlari blokidan quvvatlanadi. Mashinada bir quvvatlanishda 590 km yo‘l bosib o‘tish mumkin.