Bo‘rijar kanalidan murda topildi. U Milliy gvardiya xodimlaridan qochgani aytilmoqda

Facebook ijtimoiy tarmog‘ida Bo‘rijar kanalidan murda topilgani haqida xabar tarqaldi.

O‘zbekiston Respublikasi Bosh prokuraturasi jamoatchilik bilan aloqalar va huquqiy axborot bo‘limi boshlig‘i Hayot Shamsutdinovning yozishicha, Facebook’da joriy yilning 14 fevral kuni Toshkent shahar, Yakkasaroy tumani, Sharshara ko‘chasida Milliy gvardiya xodimlari huquqni muhofaza qiluvchi idora xodimi deb taxmin qilinayotgan bir nafar shaxsning ortidan quvgani haqida ma'lumot berilgan.

Bildirilishicha, so‘ng u o‘zini Bo‘rijar kanaliga tashlaganligi va oradan 2 hafta o‘tgach ushbu kanaldan uning murdasi topilganligi to‘g‘risida xabar tarqatilgan.

Hayot Shamsutdinovning bildirishicha, hozirda mazkur holat yuzasidan prokuratura organlari tomonidan tergovga qadar tekshiruv harakatlari o‘tkazilmoqda.