Shayx hazratning surdotarjimoni: «Imo-ishoralarim bilan dinimiz mohiyatini yetkaza olgan bo‘lsam juda xursandman»

– Rustamjon, xush kelibsiz. Avvalo o‘zingizni tanishtirsangiz va surdotarjimonlik sohasida ishlashingizga nima turtki bo‘lganini so‘zlab bersangiz.

– Assalomu alaykum. Taklif qilganlaringiz uchun rahmat. Men aslida soham bo‘yicha futbol murabbiyiman, O‘zbekiston davlat jismoniy tarbiya institutini tugatganman. 28 yoshdaman, oilam, bir o‘g‘lim va bir qizim bor.

Surdotarjimonlikni boshlashim hayotimdagi katta burilishlardan biri bo‘ldi, deya olaman. Ma'lumki, yurtimizda minglab kar-soqov insonlar bor. Ular Islom ma'rifatidan bebahra qolmasligi kerakligi allaqachon anglab yetilgan va bu bo‘yicha qator dasturlar amalga oshirilib kelinmoqda. Jumladan, poytaxtning yirik masjidlarida imomlar yonida surdotarjimonlar ishlashmoqda va juma ma'vizalarini to‘g‘ridan-to‘g‘ri tarjima qilish yo‘lga qo‘yilgan. Mana shu jarayonlarga oz bo‘lsa-da hissamni qo‘shay deb shu sohada ishlayapman.

– Shayx hazratning ma'ruzalarini tarjima qilish loyihasi qanday tug‘ilgan?

– Hazratning ma'naviy merosi shu qadar ulkanki, hali ko‘pchilik avlodlar o‘rganib, bahra olishlari uchun yetarli. Diniy qo‘mita va O‘zbekiston Musulmonlar idorasi tashabbusi bilan Ramazon kunlarida shayximizning ma'ruzalaridan iborat mana shunday loyiha xalqimizga taqdim etilayotgani, shunda surdotarjimon sifatida ishtirok etishga taklif etishganida juda xursandchilik bilan rozilik berdim.

Agar kamtarona mehnatim oz bo‘lsa-da ma'qul bo‘lgan bo‘lsa, shu savobli ishlarga bosh qo‘shib qolgan bo‘lsam baxtliman, albatta.

– Bu loyiha qancha vaqt oldin tayyorlab qo‘yilgan, faqat bu yilgi ramazonga mo‘ljallangan 30 kunlik dasturlarmi yoki kelgusida ham davom ettirilishi rejalashtirilganmi?

– Yuqorida aytganimday, shayx Muhammad Sodiq Muhammad Yusuf hazratlarining turli yillarda qilgan ma'ruzalari mavjud. Men faqat bu yil taqdim etilgan ma'ruzalardan boxabarman, ular ramazondan oldin to‘liq tayyorlab qo‘yilgandi.

Bordi-yu kelgusida ham shunday rejalar bo‘lsa hamda mening xizmatimga ehtiyoj sezsalar, bajonidil rozi bo‘laman.

– Muxlislaringizdan biri shunday maktub yo‘llabdi: «Bir oy Ramazonda shu yigit bizga qadrdon bo‘lib qoldi. In shaa Alloh, Toshkentga borsam, shu yigitni topib, bir imo-ishoralashaman. Ko‘p narsani bilib oldim. Yuzingni siypalasang musulmon degani, barmog‘ingni labingga bossang Ramazon degani ekan. Hazrat arabcha duo qilayotganda «jim turib», duo qilishlari biram yarashadi. Biz Qur'on o‘qilayotganida ham jim turishni bilmasligimizdan uyalib ketaman...».

Yuz siypalansa, musulmon degani; barmoq labga bosilsa, Ramazon degani, to‘g‘rimi?

– E'tibor berganlari, qiziqib kuzatib, ancha-muncha so‘zlarni tushunib olganlari uchun katta rahmat. Bizni yo‘qlab kelganlarni Alloh yo‘qlasin. Imo-ishoralarni asosan to‘g‘ri anglabdilar, o‘rganmoqchi bo‘lgan inson ana shunday e'tibor qilsa, qunt bilan kuzatsa, albatta o‘zlashtirib oladi. O‘zbekiston imo-ishora tili MDH davlatlariniki bilan bir xil.

Fursatdan foydalanib, fikrimni, taklifimni aytib o‘tmoqchi edim. Yurtimizda taqdim etilayotgan asosiy teledasturlar, mashhur seriallar surdotarjima bilan berilishi kerak. Axir kar-soqov yurtdoshlarimizni o‘z holiga tashlab qo‘yishimiz durust bo‘lmaydi. Rivojlangan davlatlarni kuzatsak, biror yangilik dasturi surdotarjimasiz efirga berilmaydi.

– Bilishimizcha, kar-soqovlar bo‘yicha O‘zbekiston terma jamoasi murabbiyi ham bo‘lgan ekansiz. Shu faoliyatingiz haqida ham so‘zlab bersangiz.

– To‘g‘ri, bu borada yutuqlarimiz ham bor. 2017 yilda Tailandning Bangkok shahrida bo‘lib o‘tgan U-18 yoshlar o‘rtasidagi Jahon chempionatida qatnashib, faxrli 1-o‘rinni egallaganmiz.

Ayni paytda 101-maxsus maktab internatda va Mirzo Ulug‘bek tumani BO‘SMda murabbiylik faoliyatimni davom ettirmoqdaman.

– Samimiy suhbatingiz uchun rahmat.

Abror Zohidov suhbatlashdi.

Fursatdan foydalanib, Shayx Muhammad Sodiq Muhammad Yusuf hazratlarining mehmonimiz tomonidan tarjima qilingan «So‘z odobi va til ofatlari» ma'ruzasini taqdim qilamiz.