Shohrux G‘iyosov - niqob taqmagan quvalik yigit idoraga majburan olib borilgani haqida

Farg‘ona viloyatining Quva tumanida 20 yoshli Ahror Anvarov 31 mart kuni tibbiy niqob taqmay ko‘chada yurgani uchun uch nafar ichki ishlar xodimi tomonidan majburan mashinaga o‘tqizilib, mahalla huquq-tartibot maskaniga olib ketilgan. Yigit ko‘p o‘tmay vafot etgani ijtimoiy tarmoqlarda muhokamalarga sabab bo‘ldi.

Koronavirus pandemiyasi davom etmoqda va fuqarolarning karantin qoidalariga amal qilishi zarurat hisoblanadi. Jamoat joylarida niqob taqib yurish majburiy bo‘lib, unga amal qilmaslik jarimaga tortilishga sabab bo‘ladi.

Biroq Quvadagi holatda fuqaro niqob taqmagani uchun unga kuch ishlatilgani – majburan idoraga olib ketilgani, bu jarayonda uning kiyimi yirtilgani, boz ustiga xodimlarning o‘zlari ham tibbiy niqob taqmagan bo‘lishi mumkinligi aytilmoqda.

Kun.uz muxbiri shu haqdagi savol bilan Ichki ishlar vazirligi axborot xizmati rahbari Shohrux G‘iyosovga murojaat qildi.

«Bu bo‘yicha sizlar juda yaxshi jurnalistik surishtiruv o‘tkazdinglar. Ichki ishlar xodimi biror qaror qabul qilganidan so‘ng, uning qarori ustidan shikoyat tushsa, albatta xizmat tekshiruvi o‘tkaziladi.

Ayni vaqtda Quvadagi holat bo‘yicha xodimlarning harakatlariga huquqiy baho berish uchun prokuratura va Ichki ishlar vazirligining O‘z xavfsizlik xizmati tomonidan tekshiruv o‘tkazilmoqda.

Hozirgi paytda ichki ishlar xodimlari tibbiy niqob taqmay, karantin qoidalarini buzayotgan fuqarolarni asosan ogohlantiryapti. Qo‘pol qoidabuzarliklar, bir necha bor qaytarilgan qonunbuzilish holatlari yoki xizmat ko‘rsatish sohasidagi qoidabuzarliklarni esa jarimaga tortmasak bo‘lmaydi, bu o‘z-o‘zidan tushunarli.

Misol sifatida aytsam, kecha [8 aprel] bir sutka davomida 1500 dan ortiq fuqaroga karantin qoidalarini buzganlik uchun jarima qo‘llanilgan, bundan 5 barobar ko‘p fuqaro esa ogohlantirilgan», – dedi Shohrux G‘iyosov.

U Quvadagi holatga to‘xtalar ekan, ichki ishlar xodimi fuqaro bilan muloqotda kasb etikasiga rioya qilishi kerakligi, shu bilan birga zarurat tug‘ilganda fuqaroning shaxsini aniqlash uchun uni idoraga olib borish huquqiga ega ekanini aytdi.

«Ichki ishlar xodimining qonuniy talabini fuqaro bajarmasa, xodim uning muayyan huquqlarini cheklash huquqiga ega, ya'ni uni to‘xtatib, shaxsini aniqlash uchun ichki ishlar organiga olib borishi mumkin.

Lekin har bir holatda voqea joyida ichki ishlar xodimi vaziyatdan kelib chiqib o‘zi qaror qabul qiladi. Ichki ishlar xodimi fuqaroga muloyim va odob bilan gapirishi kerak, kasb etikasida hammasi belgilangan. Xodimning qonuniy talabiga bo‘ysunmaslik holatida esa, xodim fuqaroga nisbatan majburiy choralar ko‘rishga majbur bo‘ladi.

Fuqaroning shaxsini aniqlashga zarurat tug‘ilsa, o‘sha joyning o‘zida buning imkoni bo‘lmasa, ichki ishlar xodimi uni idoraga taklif qiladi. Bu – qonuniy talab. Fuqaro buni bajarishi kerak. Masalaning boshqa jihati, xodim fuqaroga bu talabini qanday tushuntirishi. Shu nuqtada nizoli vaziyatni keltirib chiqarmaslik xodimning tajribasiga, saviyasiga bog‘liq.

Xodim ustidan biror shikoyat tushgan holatlarda albatta xizmat tekshiruvi o‘tkaziladi», – dedi IIV rasmiysi.

G‘iyosovning qayd etishicha, Quvadagi holatda ichki ishlar xodimining o‘zi niqobsiz bo‘lgani haqida da'volarga tekshiruv natijasida aniqlik kiritiladi. Xodim mansab vakolatlaridan chetga chiqqan bo‘lsa, unga nisbatan chora ko‘riladi.

Mavzuga oid: