Ekologiya qo‘mitasi rasmiylari botqoqlar bo‘yicha konvensiya rahbari bilan muzokara o‘tkazdi

Davlat ekologiya qo‘mitasi delegatsiyasi Xalqaro ahamiyatga ega, ayniqsa suvda suzuvchi qushlarning yashash joylari bo‘lgan suvli-botqoq joylar to‘g‘risidagi konvensiya bosh kotibi Marta R. Urrego bilan uchrashuv o‘tkazdi. Bu haqda qo‘mita matbuot xizmati xabar bermoqda.

Uchrashuvda suv qushlarining yashash joylari uchun muhim bo‘lgan muhofaza etiladigan tabiiy hududlarni kengaytirish bo‘yicha erishilgan yutuqlar va keyingi rejalarga to‘xtalib o‘tildi.

O‘zbekiston tomoni tabiiy resurslarni barqaror boshqarish sohasidagi hozirgi holat va siyosat, muhofaza qilinadigan tabiiy hududlarni, shu jumladan Ramsar obektlarini saqlash va kengaytirish rejalari haqida ma'lumot taqdim qildi.

Kotibiyat suv botqoq yerlarida tadqiqot ishlarini olib borish sohasida faoliyat yuritayotgan asosiy mutaxassislarning institutsional salohiyatini kuchaytirishga yordam berishga tayyorligini bildirdi.

Tomonlar 2021 yil noyabr oyida bo‘lib o‘tadigan 14-Tomonlar konferensiyasida ishtirok etishning muhimligini ta'kidladilar. Konferensiyada 2020 yildan keyingi bioxilma-xillikning global tizimi va global maqsadlarga erishishning asosiy ko‘rsatkichlari muhokama qilinishi kutilmoqda.

Uchrashuv yakunida kotibiyat O‘zbekiston hukumatiga respublikada Ramsar ro‘yxatiga kiritilgan botqoqli ekotizimlar va obektlarni saqlashga e'tibor qaratayotgani uchun minnatdorchilik bildirdi, shuningdek, yangi Ramsar hududlarini tashkil etish va boshqarishda ekspert yordamini ko‘rsatishga tayyorligini bildirdi.

BMT Bosh Assambleyasining 75-sessiyasi tomonidan 2021 yil 30 avgustda qabul qilingan Ramsar konvensiyasi qabul qilingan sana 2 fevralni – Butunjahon suv-botqoqli yerlar kuni deb e'lon qiluvchi rezolyutsiyasini qabul qilish tashabbusi respublika tomonidan qo‘llab-quvvatlangani uchun minnatdorchilik bildirildi.

Ma'lumot uchun, hozirda O‘zbekiston hududida Ramsar konvensiyasi ro‘yxatiga kiritilgan 3 ta obekt mavjud: Dengizko‘l (2002), Aydar-Aynasor ko‘llar tizimi (2008), shuningdek, Quyimozor va Tudako‘l suv omborlari (2020).