Florida shtati Baydenni sudga berdi

Sudga shikoyat arizasini Florida bosh prokurori Eshli Mudi va Ron Desantis topshirgan. Hujjatda NASA va boshqa agentliklar Florida bilan ko‘plab shartnomalar tuzishi, shtat bilan amaldagi kelishuvlarga egaligidan foydalanib, Bayden ma'muriyatining noqonuniy talablarini shtatga suqishtirishga intilishi aytilgan. 

Shuningdek, jurnalistlar oldida Floridaning majburiy emlanish talabi sababli o‘z ishidan mahrum bo‘lgan yoki emlanishdan bosh tortganlik uchun o‘z ishini yo‘qotishdan xavotirlanayotgan aholisi ham ishtirok etgan.

AQSh prezidenti yozda ijrochi hokimiyatning barcha xodimlari koronavirusga qarshi emlanishini talab qiluvchi farmonni imzolagan. Sentyabrda esa u federal agentliklarga ishlovchi barcha pudratchi kompaniyalar o‘z xodimlarining 8 dekabrgacha to‘liq emlanishini ta'minlashi kerakligi haqidagi yana bir farmonni chiqargan.

Florida shtati rahbariyatining fikricha, aholidan majburiy emlanishni talab qilish noqonuniy hisoblanadi. Shtat gubernatorining ta'kidlashicha, AQSh fuqarolari, jumladan shtat aholisi ham emlanish borasida o‘zi mustaqil qaror qabul qilishi kerak. U odamlarni emlanishga majburlash jamiyatda hukumatga nisbatan ishonchsizlik darajasi oshishiga olib kelishi mumkinligini qo‘shimcha qilgan.

Avvalroq Bayden sobiq prezident Donald Trampni uning prezidentligi vaqtida aholini emlash sur'atlari past bo‘lgani uchun tanqid qilgandi. Oq uy rahbarining ta'kidlashicha, Tramp vaqtida vaksinalar ishlab chiqilib, emlash kampaniyasi boshlangan bo‘lsa-da, bor-yo‘g‘i 2 mln kishi emlangan, uning prezidentligi vaqtida esa hozirgi kungacha 190 mlndan ko‘proq kishini emlashga muvaffaq bo‘lindi.