“Davlat tili to‘g‘risida”gi qonun qayerda? - Senatorlar o‘zlari 5 oy oldin ma'qullagan qonunni eslolmayapti

19 noyabr kuni AOKA majlislar zalida Oliy Majlis Senati a'zolari ishtirokida matbuot anjumani bo‘lib o‘tdi.

Tadbirda Kun.uz muxbiri Senat tomonidan 5 oy oldin ma'qullangan “Davlat tili to‘g‘risida”gi O‘zbekiston Respublikasining Qonuniga o‘zgartish va qo‘shimchalar kiritish haqida”gi qonunning keyingi taqdiri bilan qiziqdi.

“Senat bu qonunni ma'qullagandi, lekin shundan keyin uning taqdiri noma'lum qoldi. Xo‘sh, keyin nima bo‘ldi, u amalga kirdimi yoki yo‘qmi?” – deya savol bilan yuzlandi jurnalist.

Senator Narimon Umarov savolga javoban bu qonun yangi tahrirda Senatga hali kirmaganini bildirdi.

“Davlat tili to‘g‘risida”gi qonun yangi tahrirda bizga kirmagan. Buni kimlardir ishlayotganidan xabarimiz bor. Lekin bu hali loyiha sifatida ham ko‘rilmagan. Ma'lumotingiz uchun, Qonunchilik palatasidan bizga hali kirib kelmagan”, – dedi Umarov.

Shundan so‘ng jurnalist tushunmovchilik bo‘layotgani, ushbu qonun Senatda allaqachon ma'qullanganini tushuntirishga urindi. Ammo Narimon Umarov yanglishmayotganini qat'iy ta'kidladi.

“Ilyosjon, biz kecha-kunduz Senatda o‘tirib ishlaymiz, siz esa yodingizga bir kelganda Senat bilan gaplashasiz. Kirgan bo‘lsa, aytardik. Kirgan derdik. Qonunchilik palatasidan so‘rang, do‘stim. Bizda yo‘q. Nima, yosh bolaga o‘xshab bir-birimizni aniqlashtiramizmi endi?

Kimdir saylov oldidan qonunda o‘zgarish qilaman deb yuribdi, lekin bu hali o‘zgarish degani emas. U qonun hali kirishi kerak, loyiha sifatida qabul qilinishi kerak”, – dedi Senat a'zosi.

Ma'lumot uchun, “O‘zbekiston Respublikasining Davlat tili to‘g‘risida”gi qonuniga o‘zgartish va qo‘shimchalar kiritish haqida”gi qonun loyihasini Qonunchilik palatasi shu yilning 24 mart kuni qabul qilgan.

Shundan keyin qonun 26 iyun kuni Senatning 16-yalpi majlisida muhokama qilingan va ma'qullangan. Bu haqda Senatning rasmiy saytida ham ma'lumot berilgan.

19 noyabrdagi matbuot anjumanida Narimon Umarovdan tashqari yana o‘ndan ortiq senator qatnashdi, biroq ular ham masalaga aniqlik kiritmay, sukut saqladi.

Konstitutsiyaning 84-moddasiga asosan, Senat ma'qullagan qonun imzolanishi va e'lon qilinishi uchun o‘n kun ichida prezidentga yuboriladi. Qonun prezident tomonidan 30 kun ichida imzolanadi va e'lon qilinadi.