Qozog‘istondagi tartibsizliklar vaqtida ikki nafar Qirg‘iziston fuqarosi halok bo‘lgani ma’lum qilindi

Xabar qilinishicha, Qozog‘iston huquq-tartibot organlari tomonidan besh nafar Qirg‘iziston fuqarosi qo‘lga olingan.

Foto: EPA/Vostock-photo

Qirg‘izistonning ikki nafar fuqarosi Qozog‘istonda yuz bergan tartibsizliklar vaqtida halok bo‘lgan. Bu haqda Qirg‘iziston davlat milliy xavfsizlik qo‘mitasi ma’lum qildi, deb xabar berdi TASS.

"10 yanvar holatiga ko‘ra, huquq-tartibot kuchlari o‘tkazgan tadbirlar natijasida besh nafar Qirg‘iziston fuqarosi qo‘lga olingan, ommaviy tartibsizliklar vaqtida ikki nafar qirg‘iz fuqarosi halok bo‘lgan", - deyiladi xabarda.

Ma’lumot berilishicha, mamlakat xavfsizlik qo‘mitasi, TIV va IIV "og‘ir huquqiy holatga tushib qolgan Qirg‘iziston fuqarolari sonini aniqlash bo‘yicha qozog‘istonlik hamkasblari bilan ikki tomonlama aloqada bo‘lib turibdi".

Xabarga ko‘ra, "qo‘lga olingan fuqarolar kerakli tekshiruv tadbirlaridan so‘ng qo‘yib yuborilmoqda".

"Shu munosabat bilan Qozog‘istondagi vatandoshlarimizni xotirjamlik va tushunishga chaqiramiz", - deyiladi xabarda.

Avvalroq Qirg‘iziston hukumati Qozog‘istonda bo‘lib turgan va o‘z vataniga qaytish istagida bo‘lgan mamlakat fuqarolarini evakuatsiya qilishni boshlagandi.

#Qirg‘iziston #Qozog‘iston

2 yanvar kuni Qozog‘istonning Mang‘istau oblastida suyultirilgan gaz narxi ikki baravarga ko‘tarilganidan norozi bo‘lgan qozog‘istonliklar ommaviy mitingga chiqishdi va keyingi kunlarda namoyishlar butun mamlakat bo‘ylab yoyildi.