Hududlarda elektr ta’minoti tiklanmoqda - Energetika vazirligi

Energetika vazirligi elektr stansiyalar bosqichma-bosqich ishga tushirilayotgani, hududlarda elektr ta’minoti tiklanayotganini ma’lum qildi.

«Toshkent viloyatidagi Chorvoq, Xo‘jakent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlandi.

Respublikamizning ayrim hududlarida elektr ta’minoti tiklanmoqda.

Holat yuzasidan qo‘shimcha ma’lumot berib boriladi», deyiladi vazirlik xabarida.

Vazirlik shu munosabat bilan tabiiy gaz va elektr energiyasi bilan bog‘liq ko‘ngilsiz holatlar oldini olish maqsadida gaz hamda elektr jihozlarini nazorat qilish hamda tarmoqdan vaqtincha uzib qo‘yishni tavsiya etgan.

Bundan oldinroq Energetika vazirligi Qozog‘iston elektr tarmog‘ida katta avariya bo‘lishi oqibatida mintaqa elektr energiya ta’minotida o‘chishlar yuzaga kelganini ma’lum qilgandi.