Yomg‘ir yig‘uvchi moslama, shirin kartoshkalar – innovatsion forumda yangi loyihalar taqdim qilindi

11-12 mart kunlari Innovatsion rivojlanish vazirligida turli innovatsion loyihalardan iborat bahorgi forum bo‘lib o‘tdi. Unda respublika viloyatlaridan kelgan olim va ixtirochilar o‘z ishlanmalari bilan ishtirok etishdi.

Forumda Guliston davlat universiteti tomonidan sho‘r yerlarda yaxshi o‘suvchi batat o‘simligi namoyish qilindi. Universitet talabasi Jannatoy Turdiqulovaning ma’lumot berishicha, bu – kartoshka o‘rnini bosadi, tarkibida glyukoza, oqsil, kraxmal miqdori yuqori bo‘ladi. Kartoshkadan afzalligi – uni ko‘chat holida ham, hosilidan ham ko‘paytirish mumkin.

“Bir tup kartoshka 2-3 kilogramm hosil bersa, batatdan 4-6 kilogrammgacha hosil olish mumkin. Undan kraxmal, poyasidan benzin olish mumkin”, – dedi u.

Batatning qizil navini Toshkent davlat agrar universiteti Samarqand filiali xodimi Anvar Shamsiyev ham namoyish qildi. Unga ko‘ra, zararkunandalar batatga ta’sir ko‘rsatmaydi, undan un va un mahsulotlarini tayyorlashni yo‘lga qo‘ysa bo‘ladi.  

Forumda Toshkent tibbiyot akademiyasi tomonidan ko‘p funksiyali, biologik parchalanuvchi qoplama taqdim etildi. U mikrobli zararlanishlardan so‘ng to‘qima va a’zolarning tiklanishini tezlashtirish uchun mo‘ljallangan.

“Qoplamaning o‘ziga xos xususiyati zararlangan jarohatlarni bitishini jadallashtirish, jarohatlarning tuzalish vaqtini kamaytirish, ko‘z shox-pardasini tiklashdan iborat”, – deydi akademiyasi xodimi L. Xegay.

Ko‘rgazmada Qoraqalpoq davlat universiteti tomonidan namoyish qilingan ortopedik yostiqchalar, umurtqa pog‘onasining to‘g‘ri bo‘lishi uchun yordam beradi.

Universitet professori, biologiya fanlari doktori Allaniyozova Mapruzaning tushuntirishicha, bu yostiqchalar yotib qolgan bemorlarning yotoq yara bo‘lmasligiga ham yordam beradi. Chunki ular havo o‘tkazadi. Yostiqcha ichiga solingan mahsulot ham tabiiy bo‘lganligi uchun allergik kasalliklarni keltirib chiqarmaydi.

Bundan tashqari, universitet daraxtlar uchun yomg‘ir suvini yig‘ib beruvchi moslama, juda past olovda ham xonani yaxshi isituvchi Ijdan gaz kotyollari, qurilish chiqindilaridan tayyorlangan ko‘mir o‘rnini bosuvchi mahsulot va lego g‘ishtlarni ham taqdimot qilishdi.

Forum yakunida 61ta tayyor ilmiy ishlanmalarni amaliyotda qo‘llash va tadqiqot ishlarini bajarish uchun 14 milliard so‘mlik shartnomalar imzolandi.