Qoʻshimcha funksionallar
-
Tungi ko‘rinish
Kuchli chang bo‘ronlari: Uchquduqda elektr uzilgan, Urganchda ayrim bino tomlari uchib tushgan
Chang bo‘ronlari Navoiy va Buxoro hududlaridan tashqari, Qashqadaryo, Samarqand va Xorazmning ayrim tumanlarida ham kuzatilgan. Uchquduq tumanida elektr uzilgani, Urganch shahrida kuchli shamoldan ayrim bino tomlari uchib tushgani aytilmoqda.
Foto: Ijtimoiy tarmoqlar
«O‘zgidromet» ma’lumotiga ko‘ra, agentlikning Buxoro va Navoiy viloyatlaridagi ayrim kuzatuv stansiyalarida 21 may kuni shamolning maksimal kuchi 25 metr/sekundga yetgan.
Zarafshon kuzatuv stansiyasi mahalliy vaqt bilan soat 14:05da kuchli chang bo‘roni kuzatilayotgani va ko‘rinuvchanlik 500 metrgacha pasayib ketgani haqida xabar bergan.
Favqulodda vaziyatlar vazirligining so‘nggi ma’lumotiga ko‘ra, kuchli shamol va chang bo‘ronlari Navoiy viloyatining Navoiy shahar, Qiziltepa, Karmana va Navbahor tumanlarida, Buxoro viloyatining Buxoro shahri va G‘ijduvon, Peshko‘, Romitan tumanlarida, Samarqand viloyatininng Paxtachi tumanida hamda Qashqadaryo viloyatining Muborak tumani hududilarida ham kuzatilgan. Bu tabiat xodisasi oqibatida talofatlar bo‘yicha hududiy FVBlariga va hamkorlikdagi xizmatlarga murojaatlar kelib tushmagan.
Ijtimoiy tarmoqlarda turli hududlarda kuzatilgan chang bo‘ron hodisalarining tasvirlari tarqalmoqda.
Chang va qum bo‘ronlari dastlab Qizilqum cho‘l hududlarida kuzatilgan. G‘arbdan sharqqa – Navoiy viloyati va Buxoro shaharlariga tomon harakatlangan.
Navoiy viloyati Uchquduq tumanida kuchli shamol
Buxoro shahrida kuchli shamol va chang bo‘ronlari
Navoiyning Uchquduq tumanida kuchli shamol va chang bo‘ronlari elektr uzilishiga olib kelgan.
Qashqadaryo viloyati Muborak va Koson tumanlarida ham chang bo‘roni kuzatilgan.
Xorazm viloyati Urganch shahri va Navoiyning Uchquduq tumanida kuzatilgan kuchli shamol oqibatida ayrim bino inshootlarining tom yopilmasi uchib tushgan.
Gidrometrolog Erkin Abdulahatovning yozishicha, hozir atmosferada shunday vaziyatki, Navoiy va Buxoro viloyatlarida kuchli shamollar sharqqa tomon sekinlashish holatiga tushmoqda.
«O‘zgidromet» xabariga ko‘ra, chang bo‘ronlari 22 may tongida Surxondaryo viloyati janubi, kunduz kuni Farg‘ona vodiy viloyatlarida kuchli shamollar bo‘lishi kutilmoqda.
