Shotlandiya qirolicha Yelizaveta II bilan xayrlashdi

Edinburgdagi Avliyo Egidiy soborida 12 sentabr, dushanba kuni Yelizaveta II bilan vidolashuv marosimi bo‘lib o‘tdi. Marosimdan oldin Edinburgdagi «Qirollik milyasi» deb nomlangan jarayon o‘tkazildi, bunda minglab odamlar Holirud saroyini tark etgan Buyuk Britaniya marhum qirolichasining tobuti bo‘lgan kortejni kuzatib qoldi. Bundan oldin saroyda qirol Charlz III’ga Edinburgning tantanali kalitlari topshirildi. Monarx va qirol oilasining boshqa a’zolari tobutdan keyin yurib bordi.

Soborda Yelizaveta II’ning barcha to‘rt farzandi onasi tobuti yonida faxriy qorovul sifatida turdi. Marosim 10 daqiqa davom etdi va unda malika Anna unda ilk bor ishtirok etdi - u erkaklar mundirida edi, deb yozadi BBC. Ayni damda, minglab odamlar Yelizaveta II bilan xayrlashish uchun navbatga turishdi. Politsiyaning AFP’ga aytishicha, tun bo‘yi ochiq qoladigan soborga kirish huquqini kutayotganlarga 30 000 ta maxsus bilaguzuk tarqatilgan. 

Marhum qirolichaning jasadi solingan tobut 13 sentabr erta oqshomgacha Avliyo Egidiy soborida qoladi, shundan so‘ng u London yaqinidagi Qirollik harbiy-havo kuchlari bazasiga samolyotda yetkaziladi. U yerdan jasad Bukinhem saroyiga olib boriladi, u yerda qirol Charlz III va uning rafiqasi Kamilla uni kutib oladi. 

14 sentabr kuni tushdan keyin tobut Vestminster saroyiga yetkaziladi, u yerda to‘rt kun davomida hamma Yelizaveta II bilan xayrlashish imkoniga ega bo‘ladi. Davlat dafn marosimi 19 sentabr, dushanba kuni bo‘lib o‘tadi. Bu kun butun Buyuk Britaniyada dam olish kuni deb e’lon qilinadi. 

Edinburgga kelishidan oldin qirol Charlz III Britaniya parlamentida yangi maqomda birinchi marta nutq so‘zladi. U o‘z nutqida parlament a’zolariga hamdardlik bildirganliklari uchun minnatdorlik bildirib, Yelizaveta II’ni Buyuk Britaniyaga fidokorona xizmat qilish namunasi deb atadi. 

«Marhum malika hatto yoshligida ham o‘zini vatanga, xalqimizga xizmat qilishga, davlatimiz poydevori bo‘lgan konstitutsiyaviy boshqaruvning bebaho tamoyillarini asrab-avaylashga bag‘ishlagan, fidokorona burch timsoli bo‘lgan. Sizlarning maslahatingiz bilan men undan o‘rnak olishga qat’iy qaror qildim», dedi Charlz III. 

Buyuk Britaniya qirolichasi Yelizaveta II 8 sentabr kuni 97 yoshida vafot etdi. Shotlandiyadagi Balmoral qasrida Yelizavetaning yonida o‘sha paytda taxt vorisi shahzoda Charlz (hozir - monarx Charlz III) rafiqasi Kornuoll gersoginyasi Kamilla va singlisi malika Anna bilan birga edi. Bundan tashqari, qirolichaning ikkinchi o‘g‘li, York gersogi shahzoda Endryu va kenja o‘g‘li, Uesseks grafi shahzoda Edvard, shuningdek, nabirasi shahzoda Uilyam qasrga yetib kelishdi. Uilyamning rafiqasi, Kembrij gersoginyasi Ketrin Vindzorda qoldi. Yana bir nabirasi - shahzoda Garri Balmoralga biroz kechroq va rafiqasi, Sasseks gersoginyasi Megansiz keldi. 

Bir necha oy oldin Birlashgan Qirollik Yelizaveta II taxtga o‘tirganining 70 yilligini nishonlagan edi. U shunday uzoq vaqt hukmronlik qilgan birinchi Britaniya monarxiga aylandi.