Veterinariya va chorvachilik sohasida ko‘krak nishonlarini berish tartibi belgilandi

Hukumat qarori bilan “O‘zbekiston veterinariya fidoyisi” va “O‘zbekiston chorvachilik fidokori” ko‘krak nishonlari to‘g‘risidagi nizomlar tasdiqlandi.

Ko‘krak nishonlari bilan quyidagilar taqdirlanadi:

“O‘zbekiston veterinariya fidoyisi” ko‘krak nishoni bilan – veterinariya sohasini rivojlantirish, sohada nazoratni kuchaytirish va xizmatlar sifatini oshirish, epizootik osoyishtalik, oziq-ovqat mahsulotlari xavfsizligini ta’minlashga munosib hissa qo‘shgan fuqarolar;

“O‘zbekiston chorvachilik fidokori” ko‘krak nishoni bilan – chorvachilikni rivojlantirish, chorva mollari naslini yaxshilash, ozuqa bazasini mustahkamlashga munosib hissa qo‘shgan shaxslar.

Nomzodlar bo‘yicha takliflar har yili 1 iyulgacha Veterinariya va chorvachilikni rivojlantirish davlat qo‘mitasiga beriladi. Qo‘mita raisi tomonidan nomzodlarni ko‘rib chiqish uchun 5 kishilik komissiyalar tuziladi.

Komissiyalar nomzodlar bo‘yicha takliflarni o‘rganib 1 avgustgacha yakuniy xulosalarni qabul qiladi. Xulosalar asosida qo‘mita raisining ko‘krak nishoni bilan taqdirlash to‘g‘risidagi buyruqlari qabul qilinadi.

Ko‘krak nishonlari har yili 1 sentabr – Mustaqillik bayrami arafasida tantanali topshiriladi. Ko‘krak nishonlari bilan taqdirlanganlarga 1,2 mln so‘m miqdorida biryo‘la to‘lanadigan pul mukofoti va esdalik sovg‘alar beriladi.