Yangi koridor, vagon zavodi, Samarqand va Nukusga elektrobuslar - Ilhom Mahkamov Xitoy bilan kelishuvlar haqida

18 may kuni Xitoyning Sian shahrida O‘zbekiston prezidenti Shavkat Mirziyoyevning davlat tashrifi, 19 mayda esa Markaziy Osiyo – Xitoy sammiti bo‘lib o‘tadi.

Tashrifdan oldin, 17 may kuni Sianda O‘zbekiston–Xitoy biznes forumi bo‘lib o‘tdi. Forum doirasida Kun.uz muxbiriga intervyu bergan transport vaziri Ilhom Mahkamov XXR bilan hamkorlikdagi yangi loyihalar haqida ma’lumot berdi.

Uzoq vaqtdan buyon kutilayotgan yangi transport koridori

Eng muhim masalalardan biri – Xitoy–Qirg‘iziston–O‘zbekiston temir yo‘l qurilishi loyihasi. Ilhom Mahkamovning so‘zlariga ko‘ra, Xitoy temir yo‘llari qoshidagi loyiha instituti bilan bu temir yo‘lning texnik-iqtisodiy asoslarini ishlab chiqish yakunlangan.

“Bugun biz qirg‘iz va xitoy hamkasblarimiz bilan shu qurilishda amaliy jihatdan qanday yangi qadamlarga o‘tish bo‘yicha alohida “Yo‘l xaritasi”ga qo‘l qo‘yayapmiz”, – dedi u.

Yuk vagonlari ishlab chiqarish

Ilhom Mahkamovga ko‘ra, Xitoy tomoni bilan O‘zbekistonda yuk vagonlarini ishlab chiqaruvchi qo‘shma korxona ochish bo‘yicha kelishuvga erishilgan.

“Bu ham tannarxni tushirishga, ham [ishlab chiqarish] hajmini oshirishga imkoniyat yaratadi. Birinchi navbatda yuk vagonlari ishlab chiqariladi. Keyingi bosqichda yo‘lovchi vagonlarini ham ishlab chiqarish masalasini endi ko‘rib chiqishni boshladik”, – dedi vazir.

Boshqa hududlarga ham elektrobuslar

Xitoyning King Long va Yutong kompaniyalari bilan O‘zbekistonga 1000 ta avtobus yetkazib berish bo‘yicha kelishuv tuzilgan. Mahkamov oxirgi haftalarda avtobuslarning qariyb 600 tasi yetkazib berilgani, qolgan 400 tasi may oyi oxirigacha olib kelinishini aytdi.

“Bundan tashqari, Yutong kompaniyasi elektrobuslarni O‘zbekistonda ishlab chiqarishi ham kelishilyapti”, – deya ma’lum qildi Transport vazirligi rahbari.

Uning so‘zlariga ko‘ra, Yevropa Tiklanish va taraqqiyot bankining Samarqanddagi konferensiyasi doirasida Xitoydan olib kelingan birinchi 6 ta elektrobusning taqdimoti bo‘lib o‘tgan. Bunday elektrobuslardan 2 oy ichida Samarqand va Nukus shaharlariga 100 tadan xarid qilinishi kutilyapti.

Xitoyning Sian shahridan
Sardorbek Usmoniy,
Kun.uz muxbiri