Xitoy TIV rahbarining daragi chiqdi. Uni lavozimdan chetlatishgan va yangi vazir tayinlangan

Xitoydagi davlat nashrlari xabariga ko‘ra, seshanba kuni ushbu mamlakat tashqi ishlar vaziri, bir oy mobaynida jamoatchilikka ko‘rinish bermagan Chin Gang lavozimdan chetlatildi.

«Xitoyning oliy qonun chiqaruvchi organi seshanba kuni bo‘lib o‘tgan yig‘ilishda Van Ini tashqi ishlar vaziri  etib tayinlash uchun ovoz berdi... Chin Gang tashqi ishlar vaziri lavozimidan chetlatildi», deyilgan Xinhua davlat agentligi xabarida.

Xabarda Chin Gangning chetlatilishi sababi keltirilmagan, ammo XXR raisi Si Jinping uning o‘rniga yangi vazir tayinlash haqidagi farmoniga imzo chekkani aytilgan.

Chin rais Sining ishonchli odamlaridan hisoblangan va ko‘p tahlilchilar uning so‘nggi yillarda diplomatik pog‘onalardan tezlik bilan ko‘tarilganini ularning yaqin munosabatlari bilan  bog‘lagandi.

Oxirgi bir necha hafta mobaynida Xitoy rasmiylari Chin Gangning taqdiri to‘g‘risida sukut saqlashni lozim topdi, u 25 iyun kuni Pekinda Rossiya tashqi ishlar vaziri o‘rinbosari Andrey Rudenko bilan uchrashganidan keyin jamoatchilikka ko‘rinish bermayapti.

Uning g‘oyib bo‘lib qolishi u yoki lavozimdan chetlatilgani yoki unga nisbatan xizmat tekshiruvi o‘tkazilayotgani haqidagi taxminlar to‘lqinini keltirib chiqardi.

Bu vaqt mobaynida TIV rahbari vazifalarini kommunistik partiyaning tashqi siyosat bo‘yicha rahbari Van I bajarib turdi. Hukumat iyerarxiyasida u Chindan yuqoriroq turadi.

Van I 2013 yildan 2022 yil dekabriga qadar ham Xitoy tashqi ishlar mahkamasiga rahbarlik qilgandi.

Salomatligi holati tufaylimi?

57 yoshda bo‘lgan Chin Gang vazirlik lavozimini 2022 yil dekabrida egallagan va kommunistik Xitoy tarixida bu lavozimga kelgan eng yosh diplomat bo‘lgandi. Ungacha esa Xitoyning AQShdagi elchisi sifatida ishlagan.

25 iyundan keyin u jamoatchilik qarshisiga chiqmadi, bu esa internetning Xitoy segmentida u bilan nima bo‘lgani to‘g‘risida son-sanoqsiz versiyalarni keltirib chiqardi. Sharhlovchilar esa boshqa narsalar qatori bu safar TIV rahbari g‘oyib bo‘lgani haqidagi xabar negadir senzura qilinmayotganiga e’tibor qaratishdi.

Britaniyaning Guardian gazetasi 57 yoshli diplomat Pekin AQSh bilan munosabatlarni yaxshilashga harakat qilayotgan pallada yo‘q bo‘lib qolgani haqida yozdi.

Keyinroq tashqi ishlar vazirligi u sog‘ligidagi holat tufayli ishlay olmayotganini ma’lum qildi, ammo batafsil ma’lumotlar yo‘qligi yangi taxminlar bo‘roniga sabab bo‘ldi.

Eng keng tarqalgan mish-mishlardan biriga ko‘ra vaziyat shunday: Chin Gang go‘yoki u begona ayol bilan ishqiy munosabatlari, ya’ni rafiqasiga xiyonat qilganidan keyin tergov qilinmoqda.

Times nashri Hongkong va Tayvan matbuotiga asoslanib, u bilan bir vaqtda hongkonglik teleboshlovchi Fu Syaotyan ham g‘oyib bo‘lganini yozib chiqqan. Avvalroq, Chin Gang o‘tgan yili, hali AQShdagi elchi lavozimida ishlaganida bergan intervyusida ushbu jurnalist bilan gaplashish ohangi jamoatchilik e’tiborini tortgandi, deya qayd etadi gazeta. O‘tgan yilning noyabrida Fu Syaoten o‘g‘il farzandli bo‘lgan.

Xitoy TIV rasmiysi Mao Nin esa bu boradagi savolga javob berishdan bosh tortgan va shunday degan: «Men bu haqda hech narsa bilmayman».