Nyu-Yorkda ShHT kengashining navbatdan tashqari yig‘ilishi bo‘lib o‘tdi

O‘zbekiston tashqi ishlar vaziri Baxtiyor Saidov Nyu-York shahrida Shanhay hamkorlik tashkiloti Tashqi ishlar vazirlari kengashining navbatdan tashqari yig‘ilishida ishtirok etdi.

«Birlashgan Millatlar Tashkiloti Bosh assambleyasining 78-sessiyasi doirasida Nyu-York shahrida Belarus, Eron, Hindiston, Pokiston, Rossiya, Tojikiston, Xitoy, Qozog‘iston va qirg‘izistonlik hamkasblarimiz bilan Shanhay hamkorlik tashkiloti tashqi ishlar vazirlari Kengashining navbatdan tashqari yig‘ilishini o‘tkazdik», - deb yozdi O‘zbekiston TIV rahbari o‘zining Telegram-kanalida.

Tashkilotning mintaqaviy kun tartibidagi eng dolzarb masalalarni hal etishda samarali xalqaro tuzilma sifatidagi yetakchi roli ta’kidlandi va davlat rahbarlarining Samarqand sammitidagi qarorlari asosida ShHTni modernizatsiya qilish hamda BMT bilan o‘zaro hamkorlik istiqbollari yuzasidan fikr almashildi.