Toshkent metrosi bekatlarining ventilyatsiya tizimi eskirgani ma’lum qilindi

11 oktyabr kuni AOKAda o‘tgan matbuot anjumanida «Toshkent metropoliteni» DUK bosh muhandisi Abdutohir Abduqodirov metro bekatlarining ventilyatsiyasi bo‘yicha ko‘p e’tirozlar tushayotganini tasdiqladi.

«To‘g‘ri, ventilyatsiya tizimi bo‘yicha ko‘p e’tirozlar tushadi. Hozir ahamiyat bergan bo‘lsangiz, 1977 yilda qurilgan Chilonzor liniyasining ventilyatsiyasi ma’nan eskirgan. Lekin bu narsani hali ham ushlab turibmiz. Bu borada modernizatsiya choralari ko‘rilib, chora-tadbirlar ishlab chiqilgan. Buni yangilash bosqichma-bosqich amalga oshiriladi», – deydi u.

Shuningdek, anjumanda so‘nggi kunlarda metro yo‘lovchilari soni keskin oshayotgani ta’kidlanib, bu boradagi raqamlar ma’lum qilindi.

«Bir kunda metro liniyalarida o‘rta hisobda 690-700 ming kishi harakatlanmoqda. Ayniqsa 20 sentabr sanasidan boshlab ko‘chalarda 10 ballik avtomashina tirbandligi hisobiga avtobuslardagi yo‘lovchilarning bir qismi metroga tushgani kuzatilgan.

«Yo‘lovchilar soni keskin ko‘payishi metro vagonlariga belgilangan yo‘lovchilar soni ikki barobar ko‘payishi va vagonlarga normadan ortiq yuklama tushib, metro poyezdlari tez-tez buzilishiga olib kelmoqda», deydi metropoliten xodimi.

U tig‘iz vaqtlarda yo‘lovchilar soni me’yordan ortiq bo‘lgan metro harakat tarkiblarida 2 daqiqadan 12 daqiqagacha to‘xtab qolish holatlari 4 marta kuzatilganini qayd etgan.