Polsha Rim papasining Ukraina haqidagi so‘zlarini tanqid qildi

Polsha tashqi ishlar vaziri Radoslav Sikorskiy Rim papasi Fransiskning Rossiyaning Ukrainaga qarshi ikki yildan ortiq davom etgan urushidan so‘ng «oq bayroq ko‘tarish jasorati» haqidagi bayonotiga izoh berdi. 

«Putinni Ukrainadan armiyani olib chiqib ketish uchun jasoratga chaqirishga qarshi muvozanatni saqlashga nima deysiz? Tinchlik muzokaralarsiz darhol kelgan bo‘lardi», deb yozgan Sikorskiy 10 mart, yakshanba kuni X platformasida. 

U bir kun avval Shveytsariyaning RSI teleradiokompaniyasiga bergan intervyusida pontifikning katta rezonansga sabab bo‘lgan so‘zlariga shunday munosabat bildirdi. «Vaziyatni ko‘rgan, xalqni o‘ylaydigan, oq bayroq ko‘rsatib, muzokaralar olib borishga jur’at etgan kishi kuchliroq, deb hisoblayman», dedi Fransisk. Keyinroq Vatikan tushuntirishicha, papa Ukrainaning taslim bo‘lishini nazarda tutmagan, balki muzokaralar o‘tkazish va o‘t ochishni to‘xtatishga chaqirgan. 

Ukraina yunon-katolik cherkovi rahbari: Taslim bo‘lish hech kimning xayoliga kelmagan 

Nyu-Yorkda safarda bo‘lgan Ukraina yunon-katolik cherkovi oliy arxiyepiskopi Svyatoslav Shevchuk Rim papasi Fransisk intervyusidan so‘ng shunday dedi: «Ukraina yaralangan, ammo zabt etilmagan... Ishoning, taslim bo‘lish hech kimning xayoliga kelmagan, hatto bugun janglar ketayotgan joyda ham - Xerson, Zaporijjya, Odessa, Xarkivda. Chunki biz bilamiz: Ukraina qisman bo‘lsa ham egallab olinsa, o‘lim chegarasi kengayadi».

Shevchuk o‘z nutqida Rim papasini tilga olmadi, lekin «Ukrainaning omon qolishi mumkinligiga shubha bilan qaraydigan» barchani mamlakatga kelishga va u yerda nimalar bo‘layotganini ko‘rishga chaqirdi. «Kim Ukraina g‘alabasiga ishonmasa, iqror bo‘lsin», - deya qo‘shimcha qildi u. 

Rim papasi Ukraina bo‘yicha muzokaralar zarurligi haqida 

RSI jurnalisti Lorenso Buchchellaning Rim papasiga bergan savoli quyidagicha shakllantirildi: «Ukrainada taslim bo‘lishga, oq bayroqni ko‘rsatishga jasorat kerakligi haqida gapirayotganlar bor, ammo boshqalar bu ko‘proq kuchga ega bo‘lganga qonuniylik beradi, demoqda. Bu haqda qanday fikrdasiz?» 

Fransiskning javobi shunday bo‘ldi: «Bu talqin. Lekin men ishonamanki, vaziyatni ko‘rgan, xalqni o‘ylaydigan, oq bayroq ko‘rsatishga, muzokara qilishga jur’at etgan kishi kuchliroqdir. Bugun xalqaro kuchlarning yordami bilan muzokaralar olib borish mumkin. «Muzokaralar so‘zi - jasur so‘z. Yo‘qotayotganlaringizni, ishlar yaxshi ketmayotganini ko‘rsangiz, muzokara qilishga jur’atingiz bo‘lishi kerak. Uyalasiz, lekin bu qancha o‘lim bilan tugaydi? O‘z vaqtida muzokaralar olib boring, vositachi davlat qidiring. Bugun, masalan, Ukrainadagi urushda vositachi bo‘lishni xohlovchilar ko‘p. Turkiya buning uchun o‘zini taklif qildi. Va boshqalar. Vaziyat yomonlashmaguncha muzokara o‘tkazishga ulgurishdan uyalish kerak emas».