Surxondaryoda yo‘l harakati qoidalarini buzib, inson o‘limiga sababchi bo‘lgan haydovchi bor-yo‘g‘i 1,5 yilga qamaldi

Surxondaryo viloyati Termiz tumanida yo‘l harakati qoidalarini buzib, “Kamaz” yuk mashinasini boshqargan va YTH sodir etib, inson o‘limiga sabab bo‘lgan haydovchiga hukm o‘qildi.

“Zamon” dasturida berilgan videolavhada aytilishicha, hodisa 2024 yil 16 mart kuni soat 10:40 larda sodir bo‘lgan.

Qashqadaryo viloyati G‘uzor tumanida yashovchi 31 yoshli haydovchi yuk mashinasi bilan Termiz tumanidan o‘tuvchi M-41 va M39 avtomobil yo‘llari kesishgan chorrahada svetoforning ogohlantiruvchi chirog‘iga qaramay yo‘lida davom etgan.

Shunda yuk mashinasi o‘z yo‘lidan kelayotgan “Damas” mashinasi bilan to‘qnashgan. Oqibatda “Damas” haydovchisi og‘ir tan jarohatlari olib, hodisa joyida vafot etgan.

Holat yuzasidan jinoyat ishi qo‘zg‘atilgan va haydovchi protsessual tarzda qamoqqa olingan.

Jinoyat ishlari bo‘yicha Termiz tumani sudida o‘tkazilgan sud majlisida haydovchi Jinoyat kodeksining 266-moddasi 2-qismi bilan aybdor deb topilgan. U jabrlanuvchining oila a’zolariga yetkazilgan moddiy zararning qoplangani inobatga olinib, 1 yil 6 oy ozodlikdan mahrum etilgan.

Shuningdek, haydovchi bir yil muddatga (!) barcha turdagi transport vositalarini boshqarishdan mahrum etilgan.

Ma’lumot uchun, Jinoyat kodeksining 266-moddasi 2-qismida (transport vositalari harakati yoki ulardan foydalanish xavfsizligi qoidalarini buzib odam o‘limiga sababchi bo‘lish) 7 yilgacha qamoq jazosi nazarda tutilgan.

Avvalroq, xuddi shu modda bilan ayblangan Zomin tumanida yashovchi talaba Yoshlar ishlari agentligi kafilligi ostida sud zalidan ozod qilingandi.

O‘zbekistonda yo‘l harakati qoidalarini buzib, odam o‘limiga sababchi bo‘layotgan haydovchilarning yetarlicha jazo olmasligi holatlari jamoatchilikning e’tiroziga sabab bo‘lmoqda.

Biroq mutasaddilar odam o‘limiga sabab bo‘lgan qoidabuzarlar uchun jazoni keskinlashtirish o‘rniga, sudlarda ularga juda yengil jazo tayinlanmoqda. Jizzaxdagi va Surxondaryodagi holatlar bunga yaqqol dalil.