Podolyak: Kiyev sheriklari bilan Kursk yaqinidagi hujumni muhokama qilgan

Ukraina prezidenti devoni rahbari maslahatchisi Mixail Podolyakning ta’kidlashicha, Kiyev o‘z hamkorlari bilan Ukraina Qurolli kuchlari Kursk viloyatidagi hujumini boshlashdan avval muhokama qilgan. Bu fikr Podolyakning 14 avgust, chorshanba kuni chop etilgan Britaniyaning The Independent gazetasiga bergan intervyusida keltirilgan.

«Ayrim narsalar borki, ular hayratlanarli element bilan amalga oshirilishi va mahalliy darajada sodir bo‘lishi kerak», dedi u. «Biroq, hamkor kuchlar o‘rtasida munozaralar bo‘ldi, faqat jamoatchilik darajasida emas», - deya qo‘shimcha qildi Podolyak. 

Avvalroq Ukrainaning G‘arbdagi asosiy ittifoqchilari, jumladan Britaniya va Qo‘shma Shtatlar hujum haqida oldindan xabardor etilmaganini rasman da’vo qilgan edi. 

Storm Shadow ehtimoliy zarbalari haqida 

Podolyak shuningdek, Britaniya bosh vaziri Kir Starmer bilan Britaniyaning Storm Shadow uzoq masofali, havodan uchiriladigan qanotli raketalaridan Rossiya hududiga chuqur zarba berish uchun foydalanish imkoniyati haqida gaplashganiga aniqlik kiritdi, ammo u rad javobini olgan.

«Ukraina yo raketa va artilleriya zarbalari beriladigan bazalarni yo‘q qilishi yoki zenit qurollari bilan o‘zini himoya qila olishi kerak, bu munozaraning parametrlarini tushuna olmayapman. Biz qila olmayapmiz, chunki bizda bu yetarli emas», deya qo‘shimcha qildi u. 

«Ishonchim komilki, agar (uzoq masofaga mo‘ljallangan) qurollardan foydalanishga norasmiy taqiq olib tashlanganida, urush manzarasi butunlay boshqacha ko‘rinishga ega bo‘lardi», - deya The Independent gazetasi Podolyakning so‘zlaridan iqtibos keltirdi.

AQSh Kiyevning maqsadlariga oydinlik kiritmoqchi 

Avvalroq AQSh Davlat departamenti vakili Metyu Miller Qo‘shma Shtatlar Kiyevning hujumi haqida oldindan ogohlantirmagani, bu taktik harakatlar uchun odatiy hol ekanini ta’kidlab o‘tgandi.

«Aniq operatsiyaga kelsak, biz ular (ukrainaliklar) bilan bog‘lanib, maqsadi nima ekanligini aniqlashga harakat qilamiz», dedi Oq uy matbuot kotibi Karin Jan-Per. Uning qo‘shimcha qilishicha, Vashington «Ukraina tomoni Rossiya agressiyasidan himoyalanish uchun zarur bo‘lgan hamma narsaga ega bo‘lishini» ta’minlashga e’tibor berishda davom etadi. 

Milliy xavfsizlik kengashining strategik aloqalar bo‘yicha koordinatori Jon Kirbi aytishicha, agar Putin Kiyev harakatlaridan «o‘zini biroz noqulay his etayotgan bo‘lsa», u shunchaki «Ukrainadan chiqib ketishi» mumkin. 

Podolyak Kiyevning ShOdagi portlashlarga aloqadorligini rad etdi

Reuters bilan suhbatda Podolyak, shuningdek, Kiyevning «Shimoliy oqim» (ShO) va «Shimoliy oqim-2» gaz quvurlarida qo‘poruvchilik harakatlariga aloqadorligi haqidagi da’volarni rad etdi. «Bunday hujumni faqat katta texnik va moliyaviy resurslar mavjud bo‘lganda amalga oshirish mumkin», dedi Podolyak. «Hujum paytida bularning barchasi kimda bor edi? Faqat Rossiyada», - deb ta’kidladi u. 

Avvalroq Germaniya federal prokuraturasi portlatish ishi bo‘yicha ukrainalik Vladimir J.ni hibsga olishga order bergan edi. Die Zeit nashri yozishicha, iyun oyida Germaniya federal hukumati Vladimir J.ni hibsga olish uchun orderni u yashagan Polshaga yuborgan. Taxminlarga ko‘ra, erkak mamlakatni tark etishga muvaffaq bo‘lgan. 

Rossiyadan Germaniyaga olib boruvchi Boltiq dengizidagi «Shimoliy oqim» va «Shimoliy oqim-2» gaz quvurlarining to‘rt tarmog‘idan uchtasi 2022 yil sentabr oyi oxirida portlatilgan.