Belgiya: chechenistonlik shaxs teraktga tayyorgarlik ko‘rgani uchun 15 yilga qamaldi

Bryugge jinoiy sudi mamlakatda qator teraktlar uyushtirishni rejalashtirgan chechenistonlik shaxslarga hukm chiqardi. Bu haqda 9 sentabr, dushanba kuni Belgiyaning VRT telekanali xabar berdi. Guruh rahbari Abubakar S. 15 yilga, uning rafiqasi esa jinoyatga sheriklikda ayblanib, sakkiz yilga qamaldi. Yana ikki ayblanuvchi, jumladan, rahbarning ukasi shartli qamoq jazosi va jarimaga tortildi. Sud ish bo‘yicha beshinchi ayblanuvchini oqladi. «Sud majlisi chog‘ida Abubakar S. sudyani bir necha marta haqorat qilgan va oxir-oqibat uni kamerasiga qaytarishga to‘g‘ri kelgan», — deyiladi telekanal xabarida.

Tergov shuni ko‘rsatdiki, guruh Antverpenning bir qancha, jumladan yahudiylar yashaydigan mavzelarida, shuningdek, bar, politsiya bo‘limi va NATO binosida hujumlar rejalashtirgan, dedi Bryugge sudi matbuot kotibi Ameli Van Bellegem. Sudda ta’kidlanganidek, ayblanuvchilarning «terrorchilik hujumi uchun juda aniq rejalari» bo‘lgan: xususan, jinoyatchilar qurol saqlash uchun garaj ijaraga olgan, politsiya qo‘ng‘iroqlariga javob berish vaqtini o‘rgangan va hujumlar rejalashtirilgan joylarga tashrif buyurgan. Tergovchilar, shuningdek, Abubakar S.ning IShID terrorchilik guruhiga sodiqlik keltirgani va bomba yig‘ish bo‘yicha ko‘rsatmalari aks etgan videoni ham topdilar.

Belgiyada uch chechenistonlik terakt rejalashtirishda ayblandi 

Belgiya hukumati Chechenistonda tug‘ilgan uch fuqaroni qirollik hududida teraktni moliyalash va tayyorlashda aybladi. Belgiya prokuraturasi 26 iyul kuni gumonlanuvchilar IShID terrorchilik guruhining afg‘on bo‘linmasi bo‘lmish «Viloyati Xuroson»ga aloqador ekanliklarini ma’lum qildi.

Belgiyaning to‘qqizta shahri, jumladan Antverpen, Gent va Lejda bir vaqtning o‘zida 14 manzilda o‘tkazilgan keng ko‘lamli aksilterror operatsiyasi davomida chechenistonliklar qo‘lga olindi. Prokuratura ma’lumotlariga ko‘ra, tintuvlar davomida yetti kishi hibsga olingan, ulardan to‘rt nafari so‘roqdan keyin qo‘yib yuborilgan. Hujumning potensial nishoni haqida tafsilotlar oshkor etilmagan.

Avvalroq Germaniya Federal prokuraturasi IShIDni qo‘llab-quvvatlaganlikda gumon qilinib, ikki nafar Rossiya fuqarosi qo‘lga olingani haqida xabar bergan edi. Huquq-tartibot idoralari xodimlarining so‘zlariga ko‘ra, bu shaxslar Germaniya va Yevropa boshqa davlatlarida terrorchilik guruhiga mablag‘ to‘plagan tashkilot a’zolari bo‘lgan.

Yevropa mamlakatlarida 200 mingdan ortiq etnik chechenlar yashaydi - eng katta diasporalar Fransiya, Germaniya va Avstriyada.