O‘zbekiston va Qozog‘iston chegarasini demarkatsiya qilish shartnomasi BMTga topshirildi

TIV ma’lumotiga ko‘ra, bitim O‘zbekiston prezidenti Shavkat Mirziyoyev va Qozog‘iston prezidenti Qosim-Jo‘mart To‘qayev tomonidan 2022 yil 22 dekabr kuni Qozog‘iston rahbarining O‘zbekistonga davlat tashrifi chog‘ida imzolangan va 2023 yil 4 iyul kuni kuchga kirgan. Ushbu hujjat O‘zbekiston-Qozog‘iston davlat chegarasini xalqaro huquqiy jihatdan rasmiylashtirish bo‘yicha ko‘p yillik hamkorlikdagi ishlarning natijasidir.

Joriy yilning 25 sentabr kuni Nyu-Yorkdagi BMT Bosh Assambleyasi sessiyasi doirasida O‘zbekiston va Qozog‘iston tashqi ishlar vazirliklari rahbarlari Davlat chegarasini demarkatsiya qilish to‘g‘risidagi shartnomaning BMT Kotibiyatida ro‘yxatdan o‘tkazilgani Markaziy Osiyo davlatlari uchun misli ko‘rilmagan tajriba ekanini ta’kidladilar.

Hujjatning tarixiy ahamiyati e’tirof etilib, ushbu voqea ikki mamlakatning yaxshi qo‘shnichilik va abadiy do‘stlik tamoyillariga sodiqligini, ittifoqchilik munosabatlari ruhini, umumiy farovonlik manfaati uchun o‘zaro manfaatli hamkorlikka tayyorligini yana bir bor tasdiqlashi qayd etildi, shuningdek, bu hujjat Markaziy Osiyoda xavfsizlik va barqarorlikni yanada mustahkamlashga xizmat qilishiga urg‘u berildi.